ഡൽഹിയിൽ കനത്ത മഴയും ശക്തമായ കാറ്റും. രാവിലെ അഞ്ച് മണിയോടെ ആരംഭിച്ച മഴ ഇപ്പോഴും തുടരുകയാണ്. താഴ്ന്ന പ്രദേശങ്ങളെല്ലാം വെള്ളത്തിലായി. അണ്ടർ പാസുകളിലും വെള്ളം കയറിയതോടെ ഗതാഗതം താറുമാറായി. വീടുകളിലുൾപ്പടെ വെള്ളം കയറിയിട്ടുണ്ട്. താഴ്ന്ന പ്രദേശങ്ങളിലെ വീടുകളുടെ പകുതിയോളം വെള്ളം കയറി. നിരവധി വാഹനങ്ങളാണ് വെള്ളക്കെട്ടിൽ കുടുങ്ങിക്കിടക്കുന്നത്. ശക്തമായ കാറ്റിൽ പലയിടത്തും മരങ്ങൾ കടപുഴകിവീണു.
അടുത്ത മൂന്ന് ദിവസത്തേക്ക് ഡൽഹിയിൽ ശക്തമായ കാറ്റും മഴയും ഇടിമിന്നലും ഉണ്ടാകുമെന്ന് കേന്ദ്ര കാലാവസ്ഥാ കേന്ദ്രം അറിയിച്ചിട്ടുണ്ട്. ഡൽഹിയിൽ റെഡ് അലേർട്ട് നൽകിയിട്ടുണ്ട്. മഴ ഡൽഹി വിമാനത്താവളത്തിൻറെ പ്രവർത്തനങ്ങളെയും ബാധിച്ചു. യാത്രക്കാർ എയർലൈനുമായി ബന്ധപ്പെടണമെന്ന് ഇൻഡിഗോയും എയർഇന്ത്യയും അടക്കമുള്ള എയർലൈനുകൾ മുന്നറിയിപ്പ് നൽകി.
