Category: Saudi

രാജ്യാന്തര ഹജ് തീർഥാടകരുടെ ഒഴുക്ക് വർധിച്ചു. 21 വരെയുള്ള കണക്കനുസരിച്ച് 7,55,344 തീർഥാടകർ സൗദിയിൽ എത്തിച്ചേർന്നതായി പാസ്പോർട്ട് വിഭാഗമായ ജവാസാത്ത് അറിയിച്ചു. കര, നാവിക, വ്യോമ താവളം വഴി എത്തിയവരും ഇതിൽ ഉൾപ്പെടും. 7.25 ലക്ഷം പേരും വിമാനമാർഗം എത്തിയവരാണ്. കരമാർഗം 27,225 പേരും കടൽ മാർഗം 2,822 പേരും എത്തി. നൂതന സാങ്കേതിക വിദ്യകൾ സജ്ജമാക്കിയും നടപടികൾ സുതാര്യമാക്കിയും തീർഥാടകരുടെ നടപടിക്രമങ്ങൾ എത്രയുംവേഗം പൂർത്തിയാക്കാൻ ആവശ്യമായ എല്ലാ നടപടികളും പ്രവേശന കവാടങ്ങളിൽ ഒരുക്കിയിട്ടുണ്ടെന്നും അറിയിച്ചു.

ഹജ്ജ് വേളയിൽ ആരോഗ്യം എങ്ങനെയാണ് പരിപാലിക്കേണ്ടതെന്ന് വ്യക്തമാക്കി സൗദി ആരോഗ്യ മന്ത്രാലയം. ഇതുമായി ബന്ധപ്പെട്ട ബോധവത്കരണത്തിനായി നിരവധി മാർഗനിർദേശങ്ങൾ ഇതിൽ ഉൾപ്പെടുത്തിയിട്ടുണ്ട്.ഹജ്ജ് സീസണിൽ ആരോഗ്യ അവബോധം പ്രോത്സാഹിപ്പിക്കുന്നതിനും കർമങ്ങൾ നിർവഹിക്കാൻ സമ്മർദങ്ങളും ആരോഗ്യ അപകടങ്ങളും ഇല്ലാത്ത സുരക്ഷിതമായ അന്തരീക്ഷം ഉറപ്പാക്കുന്നതിനും മന്ത്രാലയം നടത്തുന്ന ശ്രമങ്ങളുടെ ഭാഗമായാണിത്. ശരീരത്തിൽ ജലാംശം നിലനിർത്താനും നിർജലീകരണത്തിൽനിന്ന് രക്ഷപ്പെടാനും വെള്ളം കുടിക്കൽ പതിവാക്കുകയും വെയിലത്ത് സഞ്ചരിക്കുമ്പോൾ കുട ഉപയോഗിക്കുകയും ചെയ്യണമെന്നതാണ് പ്രധാന നിർദേശങ്ങളിലൊന്ന്. തിരക്കേറിയ സ്ഥലങ്ങളിൽ ശ്വസന രോഗങ്ങൾ തടയുന്നതിന് മാസ്‌ക് ധരിക്കണം….