കുവൈത്ത് സിറ്റി : കുവൈത്ത്അന്താരാഷ്ട്ര വിമാനത്താവളത്തിൽ കഞ്ചാവുമായി മൂന്ന് ഏഷ്യക്കാര്‍ പിടിയില്‍. ഒരേവിമാനത്തിൽ വന്ന മൂന്ന് യാത്രക്കാരാണ് പിടിയിലായത്.കുവൈത്തിലെത്തിയ ഇവരെ കസ്റ്റംസ് ഉദ്യോഗസ്ഥര്‍ പിടികൂടുകയായിരുന്നു. ആദ്യത്തെ യാത്രക്കാരന്‍ ഇറച്ചിക്കുള്ളില്‍ ഒളിപ്പിച്ചാണ് കഞ്ചാവ് കടത്താന്‍ ശ്രമിച്ചത്. കഞ്ചാവ് ഇയാളുടെ ബാഗില്‍ ഒളിപ്പിച്ച നിലയിലായിരുന്നു.
രണ്ടാമത്തെ യാത്രക്കാരന്റെ പഴ്‌സിനുള്ളില്‍ കറന്‍സി നോട്ടുകള്‍ക്കുള്ളില്‍ ചുരുട്ടിയാണ് കഞ്ചാവ് ഒളിപ്പിച്ചത്. മൂന്നാമത് പിടിയിലായ യാത്രക്കാരന്‍ ടിഷ്യൂ പേപ്പറില്‍ കഞ്ചാവ് ഒളിപ്പിച്ച് ട്രൗസറിന്റെ പോക്കറ്റില്‍ സൂക്ഷിക്കുകയായിരുന്നു.
പിടിയിലായ മൂന്നു പേരും ഏഷ്യന്‍ രാജ്യത്ത് നിന്നുള്ളവരാണ്. ഇവരെ തുടര്‍ നിയമ നടപടികള്‍ക്കായി ബന്ധപ്പെട്ട വകുപ്പുകള്‍ക്ക് കൈമാറി.
കഴിഞ്ഞ ദിവസം കുവൈത്തില്‍ കഞ്ചാവും നിരോധിത ഗുളികകളും ഹാഷിഷും കുവൈത്ത് എയര്‍ കസ്റ്റംസ് അധികൃതര്‍ പിടിച്ചെടുത്തിരുന്നു. കുവൈത്ത് അന്താരാഷ്ട്ര വിമാനത്താവളത്തിലാണ് കഞ്ചാവ്, ട്രമഡോള്‍ ഗുളികകള്‍, ലാറിക ഗുളികകള്‍, ഹാഷിഷ് എന്നിവ യാത്രക്കാരില്‍ നിന്ന് പിടികൂടിയത്.
