തിരുവനന്തപുരം: കേരളത്തിൽ മൂന്ന് വർഷത്തിനുള്ളിൽ മൂന്നര ലക്ഷം സംരംഭങ്ങൾ തുടങ്ങിയെന്നും അതിൽ 31 ശതമാനം സ്ത്രീ സംരംഭകരാണെന്നും വ്യവസായ കയർ നിയമകാര്യ വകുപ്പ് മന്ത്രി പി. രാജീവ്. കേരള ഖാദി ഗ്രാമ വ്യവസായ ബോർഡിന്റെ ആഭിമുഖ്യത്തിൽ പാപ്പനംകോട് പൂഴിക്കുന്ന് ബീ കീപ്പിംഗ് ഫെഡറേഷനിൽ ആരംഭിക്കുന്ന ബീ കീപ്പിംഗ് ട്രെയിനിംഗ് ഇൻസ്റ്റിറ്റ്യൂട്ടിന്റെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.
പിഎസ്‌സി പരീക്ഷയ്ക്ക് വേണ്ടി മാത്രം ബീ കീപ്പിംഗ് പരിശീലനത്തെ കാണരുത്. തേനീച്ച വളർത്തലിൽ പുതിയ സംരംഭങ്ങൾ തുടങ്ങാനും മറ്റുള്ളവർക്ക് ജോലി കൊടുക്കാനും പരിശീലനം പൂർത്തിയാക്കുന്നവർക്ക് കഴിയണം. പരിശീലനത്തിൽ ചേരുന്നതിനുള്ള പ്രായപരിധി ഉയർത്തുന്ന കാര്യം പരിഗണിക്കും. സംരംഭകരാകാൻ ആഗ്രഹിക്കുന്നവർക്ക് സാമ്പത്തിക പിന്തുണയും സർക്കാർ ഉറപ്പാക്കുന്നുണ്ട്. കേരളത്തിൽ വലിയ വിപണി സാധ്യതയാണ് ഉള്ളത്.
ഖാദി ബോർഡിൽ വൈവിധ്യവത്ക്കരണവും ആധുനികവത്ക്കരണവും സർക്കാർ നടപ്പാക്കുന്നു. ഖാദിയുടെ മൂല്യങ്ങൾ നിലനിർത്തിക്കൊണ്ടുള്ള ആധുനികവത്ക്കരണമാണ് നടത്തുന്നത്. ഗ്രാമവ്യവസായങ്ങളെ ശക്തിപ്പെടുത്തുന്ന പ്രവർത്തനങ്ങൾക്കും സർക്കാർ മുൻതൂക്കം നൽകുന്നുവെന്നും മന്ത്രി പി.രാജീവ് പറഞ്ഞു. പരമ്പരാഗത അറിവുകളും ആധുനിക വിദ്യാഭ്യാസവും സംയോജിപ്പിച്ച് തൊഴിൽ നൈപുണ്യരംഗത്ത് വിദ്യാർത്ഥികളെ പ്രാപ്തരാക്കുന്നതിന് സർക്കാർ പ്രധാന്യം നൽകുന്നുവെന്ന് ചടങ്ങിൽ അധ്യക്ഷത വഹിച്ച പൊതുവിദ്യാഭ്യാസവും തൊഴിലും വകുപ്പ് മന്ത്രി വി.ശിവൻകുട്ടി പറഞ്ഞു. സുസ്ഥിരമായ ഒരു ഉപജീവനമാർഗഗം കണ്ടെത്താൻ കുട്ടികളെ ഒരുക്കുകയാണ് ലക്ഷ്യം. സ്‌കൂൾ വിദ്യാർത്ഥികൾക്ക് യൂണിഫോമും പാഠപുസ്തകങ്ങളും വളരെ നേരത്തെ തന്നെ ലഭ്യമാക്കി. ഒന്ന് മുതൽ 10-ാം ക്ലാസ്സ് വരെയുള്ള പാഠപുസ്തകങ്ങൾ 16 വർഷത്തിന് ശേഷം പരിഷ്‌ക്കരിച്ചു.
എസ് എസ് എൽ സി, പ്ലസ്ടു ഫലങ്ങൾ നിശ്ചിത സമയത്ത് തന്നെ പ്രഖ്യാപിക്കും. ഓരോ വിഷയത്തിനും മിനിമം മാർക്ക് ഏർപ്പെടുത്തിയിട്ടുണ്ട്. 30 മാർക്കാണ് സബ്ജക്ട് മിനിമം. എട്ടാം ക്ലാസ്സിലാണ് ഇത് ആദ്യമായി നടപ്പിലാക്കിയത്. പൊതുവിദ്യാഭ്യാസ വകുപ്പ് സമസ്ത മേഖലകളിലും വളരെ സൂക്ഷമതയോടു കൂടി കാര്യങ്ങൾ നടപ്പിലാക്കുകയാണെന്നും മന്ത്രി കൂട്ടിച്ചേർത്തു.
ഖാദി ബോർഡിന്റെ ചരിത്രത്തിൽ ആദ്യമായാണ് അക്കാദമിക് നിലവാരത്തിലുള്ള ബീ കീപ്പിംഗ് ട്രെയ്നിംഗ് ഇൻസ്റ്റിറ്റ്യൂട്ട് ആരംഭിക്കുന്നത്. ഇതിലൂടെ ആറ് മാസത്തെ എപ്പികൾച്ചർ കോഴ്സാണ് പഠിതാക്കൾക്ക് ലഭിക്കുന്നത്. 25 കുട്ടികൾ വീതമുള്ള രണ്ട് ബാച്ചുകളായാണ് ആദ്യ ഘട്ടത്തിൽ പരിശീലനം നൽകുന്നത്. ശാസ്ത്രീയമായ തേൻ ഉത്പാദനവും പ്രതിരോധശേഷിയുള്ള തേനീച്ച കോളനി പരിപാലനവും ഗവേഷണവും ഈ പരിശീലനത്തിലൂടെ സാധ്യമാകും.
ഖാദി ബോർഡ് വൈസ് ചെയർമാൻ പി ജയരാജൻ മുഖ്യപ്രഭാഷണം നടത്തി. പ്രിസൺസ് ആന്റ് കറക്ഷൻ സർവ്വീസ് ഡയറക്ടർ ജനറൽ ബൽറാം കുമാർ ഉപാദ്ധ്യായ, ഖാദി ബോർഡ് സെക്രട്ടറി ഡോ.കെ.എ രതീഷ്, കൗൺസിലർ ദീപിക, ഖാദി ബോർഡ് അംഗങ്ങൾ എന്നിവർ പങ്കെടുത്തു
