എമിറേറ്റിന്റെ വിജയഗാഥയുടെ അഭിവാജ്യ ഘടകമായ തൊഴിലാളികളെ പങ്കെടുപ്പിച്ചു കൊണ്ട് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (ജിഡിആർ എഫ്എഡി) മെഗാ ഈദ് ആഘോഷം സംഘടിപ്പിച്ചു. കാറുകളും, സ്വർണ ബാറുകളും, റിട്ടൺ വിമാന ടിക്കറ്റ് അടക്കം ലക്ഷക്കണക്കിന് ദിർഹമിന്റെ സമ്മാനങ്ങൾ ഉൾപ്പെടെയാണ് ബ്ലൂകോളർ തൊഴിലാളികൾക്കായി ആഘോഷം സംഘടിപ്പിച്ചത്. ബോളിവുഡ് താരങ്ങൾ ഉൾപ്പെടെ അണിനിരന്ന രണ്ട് ദിവസത്തെ ആഘോഷത്തിൽ ഇരുപതിനായിരത്തിലധികം ആളുകൾ പങ്കാളികളായി.
ദുബായ് അൽഖുസ് ഏരിയയിലാണ് പരിപാടി നടന്നത്. “നമുക്കൊരുമിച്ച് ഈദ് ആഘോഷിക്കാം” എന്ന പ്രമേയത്തിലാണ് ആഘോഷച്ചടങ്ങുകൾ സംഘടിപ്പിച്ചത്. ജിഡിആർഎഫ്എ ദുബായ് അസിസ്റ്റന്റ് ഡയറക്ടർ ജനറൽ മേജർ ജനറൽ ഉബൈദ് മുഹൈർ ബിൻ സുറൂർ, ദുബായ് എമിറേറ്റ്സിന്റെ വർക്ക് റെഗുലേഷൻ സെക്ടർ അസിസ്റ്റന്റ് ഡയറക്ടർ കേണൽ ഒമർ മത്വർ അൽ മുസൈന അടക്കുമുള്ള ഉന്നത ഉദ്യോഗസ്ഥർ നേതൃത്വം നൽകി
ഇന്ത്യ, പാകിസ്ഥാൻ, ബംഗ്ലാദേശ്, ഫിലിപ്പീൻസ്, ശ്രീലങ്ക, നേപ്പാൾ തുടങ്ങിയ വിവിധ രാജ്യങ്ങളിൽ നിന്നുള്ള തൊഴിലാളികൾ ഈദ് ആഘോഷത്തിൽ പങ്കെടുത്തു. സംഗീതവും നൃത്ത പരിപാടികളും, കൈനിറയെ സമ്മാനങ്ങളും സാംസ്കാരിക അവതരണങ്ങളുമൊക്കെ കോർത്ത് സംഘടിപ്പിച്ച പരിപാടി, രാജ്യത്തെ പ്രവാസി തൊഴിലാളികളോടുള്ള യുഎഇയുടെ കരുതലിന്റെയും സഹകരണത്തിന്റയും വേദിയായിമാറി. ദുബായുടെ വളർച്ചയ്ക്കും വികസനത്തിനും വലിയ രീതിയിൽ സംഭാവന ചെയ്യുന്ന തൊഴിലാളി സമൂഹത്തിന് ആദരവ് അർപ്പിക്കുന്നതിനു വേണ്ടിയാണ് പരിപാടി സംഘടിപ്പിക്കുന്നതെന്ന് ജിഡിആർഎഫ്എ ദുബായ് അസിസ്റ്റന്റ് ഡയറക്ടർ മേജർ ജനറൽ ഉബൈദ് മുഹൈർ ബിൻ സുറൂർ പറഞ്ഞു. നന്ദിയുടെയും ഉൾക്കൊള്ളലിന്റെയും മൂല്യങ്ങളോടുള്ള നമ്മുടെ പ്രതിബദ്ധത പ്രകടിപ്പിക്കാനുള്ള ഒരു മാർഗ്ഗമാണ് ഈ ആഘോഷമെന്ന് കൂട്ടിച്ചേർത്തു.
