ഈദുൽ ഫിത്ർ: ദുബായിലെത്തിയ സഞ്ചാരികൾക്ക് ഗംഭീര വരവേൽപ്പ്

ഈദുൽ ഫിത്ർ ആഘോഷങ്ങൾക്കായി ദുബായിലെത്തിയ സഞ്ചാരികൾക്ക് ഗംഭീര വരവേൽപ്പ് നൽകി. ദുബായ് രാജ്യാന്തര വിമാനത്താവളത്തിൽ എത്തിയ യാത്രക്കാർക്ക് പ്രത്യേക സമ്മാനങ്ങളും, പാസ്‌പോർട്ടിൽ “ഈദ് ഇൻ ദുബായ്” എന്ന പ്രത്യേക സ്റ്റാംപും പതിച്ചു നൽകി. കൂടാതെ, യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ ജീവചരിത്രമായ “ടു ബി ദ ഫസ്റ്റ്” എന്ന പുസ്തകവും ജിഡിആർഎഫ്എ ദുബായ് (ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ്) യാത്രക്കാർക്ക് സമ്മാനിച്ചു.

യാത്രക്കാർക്ക് സന്തോഷകരമായ ഈദ് അനുഭവം നൽകുന്നതിനായി, വിമാനത്താവളത്തിലെ നടപടിക്രമങ്ങൾ വേഗത്തിലും സുഗമമായും പൂർത്തിയാക്കാൻ ജിഡിആർഎഫ്എ ഉദ്യോഗസ്ഥർ പ്രത്യേക ശ്രദ്ധ ചെലുത്തി. ഈദിന്റെ ആദ്യ ദിവസം, യാത്രക്കാർക്ക് ലഭിക്കേണ്ട സേവനം ഉറപ്പാക്കാനും ഈദ് ആശംസകൾ നേരാനും ദുബായ് വിമാനത്താവളത്തിൽ ഉന്നത ഉദ്യോഗസ്ഥർ സന്ദർശനം നടത്തി. ജിഡിആർഎഫ്എ-ദുബായ് ഡയറക്ടർ ജനറൽ, ലഫ്റ്റനന്റ് ജനറൽ മുഹമ്മദ് അഹ്മദ് അൽ മർറി, അസിസ്റ്റന്റ് ഡയറക്ടർ മേജർ ജനറൽ ഉബൈദ് മുഹൈർ ബിൻ സുറൂർ എന്നിവരടക്കമുള്ള ഉന്നത ഉദ്യോഗസ്ഥരാണ് എയർപോർട്ടിൽ സന്ദർശനം നടത്തിയത്.

ഈദ് കാലത്ത് സഞ്ചാരികൾക്ക് സന്തോഷകരമായ അനുഭവം ഉറപ്പാക്കുന്നതിന്റെ ഭാഗമായാണ് ഉദ്യോഗസ്ഥർ ഒരുമിച്ച് എയർപോർട്ടിൽ പര്യടനം നടത്തിയത്. ദുബായുടെ പ്രശസ്തി നിലനിർത്തുന്നതിനും ലോകമെമ്പാടുമുള്ള യാത്രക്കാർക്ക് മികച്ച യാത്രാ സൗകര്യങ്ങൾ നൽകുന്നതിനും വേണ്ടി ജിഡിആർഎഫ്എ സ്ഥിരമായി നടപടികൾ സ്വീകരിക്കാറുണ്ട്. വിമാനത്താവളത്തിലെ പ്രവർത്തനങ്ങൾ ഉദ്യോഗസ്ഥർ ശ്രദ്ധാപൂർവ്വം പരിശോധിച്ചു. അവധി ദിവസത്തിലും യാത്രക്കാർക്ക് വേഗത്തിലും സുഗമമായും യാത്ര ചെയ്യാൻ സേവനം ചെയ്യുന്ന ഉദ്യോഗസ്ഥരുടെ മികവിനെ പ്രത്യേകം ലഫ്റ്റനന്റ് ജനറൽ അഭിനന്ദിച്ചു.

അതിനൊപ്പം അവർക്ക് ഈദ് ആശംസകളും നേർന്നു. 4 മുതൽ 12 വയസ്സ് വരെയുള്ള കുട്ടികൾക്കായി 2023 ഏപ്രിലിൽ തുടങ്ങിയ ‘കിഡ്സ് പാസ്പോർട്ട് പ്ലാറ്റ്‌ഫോം’, സ്മാർട്ട് ഗേറ്റുകൾ, സ്മാർട്ട് ട്രാക്ക് തുടങ്ങിയ വിമാനത്താവളത്തിലെ സൗകര്യങ്ങളും ഉദ്യോഗസ്ഥ സംഘം സന്ദർശിച്ചു. സേവനങ്ങൾ യാത്രക്കാർക്ക് തൃപ്തി നിറഞ്ഞ സർവീസ് ലഭ്യമാക്കുകയും യാത്ര കൂടുതൽ ആസ്വാദ്യകരമാക്കുകയും ചെയ്യുന്നുവെന്ന് അൽ മർറി പറഞ്ഞു.

യാത്രക്കാർക്ക് സുരക്ഷിതവും സൗകര്യപ്രദവുമായ യാത്ര അനുഭവം നൽകാൻ ദുബായ് എപ്പോഴും പ്രതിജ്ഞാബദ്ധമാണെന്ന് അദ്ദേഹം വ്യക്തമാക്കി. സംഘം എയർപോർട്ടിലുള്ള യാത്രക്കാരെ അഭിവാദ്യം ചെയ്യുകയും അവർക്ക് ഈദ് ആശംസ  നേരുകയും ചെയ്തു. ഈദ് അവധിക്കാലത്ത് വർധിച്ച യാത്രാത്തിരക്ക് കണക്കിലെടുത്ത്, യാത്രക്കാർക്ക് സൗകര്യപ്രദമായ യാത്രാനുഭവം ഉറപ്പാക്കുന്നതിനായി കൂടുതൽ ജീവനക്കാരെ എയർപോർട്ടിൽ  വിന്യസിച്ചിരുന്നു.

Leave a Reply

Your email address will not be published. Required fields are marked *