സർക്കാരിന്റ നാലാം വാർഷികാഘോഷത്തിന് ഇന്ന് കാസർകോട് തുടക്കമാകും. ഇന്ന് രാവിലെ പത്ത് മണിക്ക് കാസർകോട് കാലിക്കടവ് മൈതാനത്താണ് ഉദ്ഘാടന പരിപാടി. മുഖ്യമന്ത്രി പിണറായി വിജയനും എല്ലാ മന്ത്രിമാരും പങ്കെടുക്കും. ‘എന്റെ കേരളം’ പ്രദർശന വിപണന മേളയുടെയും സംസ്ഥാനതല ഉദ്ഘാടനം ഇന്ന് മുഖ്യമന്ത്രി നിർവഹിക്കും. സർക്കാരിന്റെ കഴിഞ്ഞ ഒമ്പത് വർഷത്തെ വികസനക്ഷേമ പ്രവർത്തനങ്ങൾ ജനങ്ങൾക്ക് നേരിട്ട് അറിയിക്കുന്നതിനായാണ് എന്റെ കേരളം’ പ്രദർശന വിപണന മേള ഒരുക്കിയിരിക്കുന്നത്.
ഏപ്രിൽ 21 മുതൽ മെയ് 30 വരെ വിപുലമായാണ് സംസ്ഥാന സർക്കാരിന്റെ നാലാം വാർഷികാഘോഷ പരിപാടികൾ സംഘടിപ്പിക്കുന്നത്. വാർഷികാഘോഷത്തിന്റെ ഭാഗമായി പ്രദർശന വിപണന മേളകളും സംഘടിപ്പിക്കും. തിരുവനന്തപുരത്താണ് വാർഷികാഘോഷ പരിപാടിയുടെ സമാപനം. പരിപാടിയുടെ ഭാഗമായി മുഖ്യമന്ത്രി കാസർകോട് ജില്ലയിലെ പ്രമുഖരുമായി ഇന്ന് സംവദിക്കും. രാവിലെ 11ന് പടന്നക്കാട് ബേക്കൽ ക്ലബ്ബിലാണ് പരിപാടി. സർക്കാർ സേവനങ്ങളുടെ ഗുണഭോക്താക്കൾ, തൊഴിലാളി പ്രതിനിധികൾ, ട്രേഡ് യൂണിയൻ അംഗങ്ങൾ, യുവജനങ്ങൾ, വിദ്യാർഥികൾ, സാംസ്‌കാരിക- കായിക രംഗത്തെ പ്രതിഭകൾ, വ്യവസായികൾ, പ്രവാസികൾ, സമുദായ നേതാക്കൾ തുടങ്ങി സമൂഹത്തിലെ വിവിധ മേഖലയിലെ പ്രതിനിധികൾ യോഗത്തിൽ പങ്കെടുക്കും.
കാസർകോട് ജില്ലയിൽ ഏഴ് ദിവസങ്ങൾ നീണ്ടുനിൽക്കുന്ന മേളയുടെ ഭാഗമായി 73,923 സ്‌ക്വയർ ഫീറ്റിൽ വിപുലമായ പന്തലാണ് ഒരുക്കിയിരിക്കുന്നത്. വിവിധ വകുപ്പുകളുടെയും സ്ഥാപനങ്ങളുടെയും സ്റ്റാളുകളും വിവിധതരം പ്രദർശന പവലിയനുകളും ഒരുക്കിയിട്ടുണ്ട്. കൂടാതെ കാർഷിക പ്രദർശനം, ഡോഗ് ഷോ, ഫുഡ് കോർട്ട്, പ്രത്യേക ചിൽഡ്രൻസ് സോൺ എന്നിവയും ഉണ്ടാവും.
കിഫ്ബിയുടെ സഹകരണത്തോടെയാണ് മേളയ്ക്ക് ആവശ്യമായ അടിസ്ഥാന സൗകര്യങ്ങൾ ഒരുക്കിയത്. ഏഴ് ദിവസങ്ങളിലും വൈകിട്ട് ആറ് മുതൽ 10 വരെ കലാപരിപാടികളും അരങ്ങേറും. പരിപാടിയുടെ പ്രചാരണ പ്രവർത്തനങ്ങളുടെ ഭാഗമായി ജില്ലാ ഇൻഫർമേഷൻ ഓഫീസ് തൃക്കരിപ്പൂർ സൈക്ലിങ് ക്ലബ്ബുമായി സഹകരിച്ച് സൈക്കിൾ റാലി സംഘടിപ്പിച്ചു.
