മറുനാടൻ മലയാളി യൂട്യൂബ് ചാനൽ ഉടമ ഷാജൻ സ്‌കറിയയ്ക്ക് ജാമ്യം. അപകീർത്തികരമായ വാർത്ത നൽകിയെന്ന പരാതിയിലാണ് ഇന്നലെ രാത്രി അറസ്റ്റിലായത്. മാഹി സ്വദേശിനിയായ യുവതി നൽകിയ പരാതിയിലായിരുന്നു നടപടി. കർശന ഉപാധികളോടെയാണ് ജാമ്യം അനുവദിച്ചത്.
വ്യക്തിപരമായ ജീവിതത്തെ ബാധിച്ച വാർത്തയാണ് ചാനലിൽ നൽകിയതെന്നായിരുന്നു പരാതിക്കാരിയുടെ ആരോപണം. തുടർന്ന് തിരുവനന്തപുരം സൈബർ പോലീസ് ഇയാളെ അറസ്റ്റ് ചെയ്തു.
തിരുവനന്തപുരത്തെ വീട്ടിൽ നിന്ന് അറസ്റ്റ് ചെയ്ത് വൈദ്യപരിശോധനയ്ക്ക് ശേഷം ഷാജനെ വഞ്ചിയൂർ മജിസ്‌ട്രേറ്റ് കോടതിയിൽ ഹാജരാക്കി. രണ്ട് ആൾ ജാമ്യത്തോടെയാണ് ജാമ്യം അനുവദിച്ചത്.അറസ്റ്റിനെതിരെ പ്രതികരിച്ച ഷാജൻ ഇത് ജനാധിപത്യവിരുദ്ധവും രാഷ്ട്രീയ പകപോക്കലുമാണ് എന്നുമാണ് പറഞ്ഞത്.
