സൗദി അറേബ്യയിലുണ്ടായ വാഹനാപകടത്തിൽ ഇന്ത്യൻ കുടുംബത്തിലെ നാല് പേർ മരിച്ചു. വെള്ളിയാഴ്ച പുലർച്ചെ ആറ് മണിയോടെ റിയാദിനടുത്ത് തുമാമയിലുണ്ടായ അപകടത്തിലാണ് ദാരുണ സംഭവം. ഇവർ സഞ്ചരിച്ചിരുന്ന കാറും സൗദി പൗരൻ ഓടിച്ചിരുന്ന ട്രെയിലറും തമ്മിൽ കൂട്ടിയിടിച്ചാണ് അപകടമുണ്ടായത്.
ഗൗസ് ദന്തു (35), ഭാര്യ തബ്റാക് സർവാർ (31), മക്കളായ മുഹമ്മദ് ദാമിൽ ഗൗസ്(2), മുഹമ്മദ് ഈറാൻ ഗൗസ് (4), എന്നിവരാണ് മരിച്ചത്. കുവൈറ്റിൽ നിന്ന് ടൂറിസ്റ്റ് വിസയിൽ സൗദിയിലെത്തിയതായിരുന്നു ഇവർ. ഹഫ്ന- തുവൈഖ് റോഡിലാണ് അപകടം. അപകടത്തിൽ കാർ പൂർണമായും കത്തി നശിക്കുകയും ചെയ്തു. മരിച്ചവരുടെ മൃതദേഹങ്ങൾ റുമാ ജനറൽ ആശുപത്രിയിലെ മോർച്ചറിയിൽ സൂക്ഷിച്ചിരിക്കുകയാണ്.
