ബഹ്റൈൻ എയർപോർട്ടിലെ ചെക്ക്-ഇൻ നടപടിക്രമങ്ങളിൽ അധികൃതർ മാറ്റം വരുത്തിയിരിക്കുന്നു. ഇതുവരെ വിമാനക്കമ്പനിയുടെ കൗണ്ടറിൽ നിന്ന് ബോർഡിംഗ് പാസ് വാങ്ങിയ ശേഷം മാത്രമായിരുന്നു ഇമിഗ്രേഷൻ കൗണ്ടറിലെത്തേണ്ടത്. എന്നാൽ, കഴിഞ്ഞ ദിവസം മുതൽ വിമാനക്കമ്പനിയുടെ കൗണ്ടറിൽ (ചെക്ക്-ഇൻ) പാസ്പോർട്ട് നൽകുമ്പോൾ തന്നെ യാത്രാവിലക്ക് അടക്കമുള്ള പ്രശ്നങ്ങൾ വ്യക്തമാകും. ഇമിഗ്രേഷനുമായി ഈ കൗണ്ടർ ബന്ധിപ്പിച്ചിരിക്കുന്നതുകൊണ്ടാണ് ഈ വിവരങ്ങൾ അറിയാൻ കഴിയുന്നത്.
ഇമിഗ്രേഷൻ കൗണ്ടറിൽ പോയി ചെറിയ പിഴകളോ മറ്റോ അടച്ചശേഷം വീണ്ടും വിമാനക്കമ്പനിയുടെ കൗണ്ടറിലെത്തി ബോർഡിംഗ് പാസ് വാങ്ങണം. ഇതിന് കുറച്ചുകാലം വേണ്ടി വരാം. പുതിയ നടപടിക്രമങ്ങൾക്കനുസരിച്ച്, വൈകി എത്തുകയാണെങ്കിൽ വിമാനക്കമ്പനിയുടെ കൗണ്ടർ അടയാനും ബോർഡിംഗ് പാസ് ലഭിക്കാതെ യാത്ര മുടങ്ങാനും സാധ്യതയുണ്ട്. ഇതുവരെ ബോർഡിംഗ് പാസ് ആദ്യം ലഭിച്ചതുകൊണ്ട് ഇമിഗ്രേഷനിൽ വൈകിയാലും യാത്ര മുടങ്ങാറില്ലായിരുന്നു.
പുതിയ നടപടിക്രമങ്ങൾ വരുത്തിയിട്ടുള്ളതിനാൽ നേരത്തെ തന്നെ എയർപോർട്ടിൽ എത്തുന്നതും യാത്രാ തടസ്സങ്ങളുണ്ടോയെന്ന് മുൻകൂട്ടി പരിശോധിക്കുന്നതും അനിവാര്യമാണ്. ചെറുകിട സാമ്പത്തിക ബാധ്യതകളും കുടിശ്ശികകളും ഒഴിവാക്കി മാത്രമേ യാത്രയ്ക്കു തയ്യാറാകാൻ പറ്റൂ. ഇലക്ട്രിസിറ്റി, ഫോൺ, മറ്റ് സർക്കാർ ഫീസുകൾ അടക്കമുള്ള യൂട്ടിലിറ്റി ബില്ലുകളിൽ കുടിശ്ശികയുണ്ടെങ്കിൽ അതിന് തടസ്സം നേരിടേണ്ടിവരും.
