അബുദാബി∙ : 5 വർഷത്തെ മൾട്ടിപ്പിൾ എൻട്രി ടൂറിസ്റ്റ് വീസ, ഗ്രീൻ റസിഡൻസി വീസ, റിമോട്ട് വർക്ക് വീസ, ഗോൾഡൻ വിസ പരിഷ്‌കാരം , തുടങ്ങി പരിഷ്കരിച്ച പുതിയ വീസ നിയമം പ്രാബല്യത്തിൽ.പഴയ വിസ നിയമങ്ങളിൽ മാറ്റം വന്നതും, പുതുതായി അവതരിപ്പിച്ച വിസകളും ഇന്ത്യക്കാർ ഉൾപ്പെടെയുള്ള വ്യവസായികൾക്കും വിദഗ്ധർക്കും വിനോദ സഞ്ചാരികൾക്കും ഗുണകരമാകും.
പുതിയ നിയമം അനുസരിച്ച് മാസത്തിൽ 30,000 ദിർഹം ശമ്പളം പറ്റുന്നവരും 10 വർഷത്തെ ഗോൾഡൻ വീസയ്ക്ക് അർഹരാണ്.ഗോൾഡൻ വീസക്കാർക്ക് യുഎഇയ്ക്കു പുറത്തു താമസിക്കുന്നതിന് ഉണ്ടായിരുന്ന കാലപരിധി 6 മാസമായിരുന്നു.എന്നാൽ പരിഷ്ക്കരിച്ച നിയമപ്രകാരം 6 മാസത്തിൽ കൂടുതൽ കാലം വിദേശത്തു താമസിച്ചാലും വീസ റദ്ദാകില്ല അതേസമയം, യുഎഇയിൽ ഗോൾഡൻ വീസ റദ്ദാക്കുന്നവർക്ക് രാജ്യം വിടാൻ 28 ദിവസം മാത്രമുണ്ടായിരുന്നത് 6 മാസമായി ഉയർത്തി.
5 വർഷത്തെ മൾട്ടിപ്പിൾ എൻട്രി ടൂറിസ്റ്റ് വീസയിൽ വരുന്നവർക്ക് വീസ കാലയളവിൽ ഒന്നിലേറെ തവണ രാജ്യത്തേക്കു പ്രവേശിക്കാമെന്നതും, തുടർച്ചയായി 90 ദിവസം യുഎഇയിൽ താമസിക്കാമെന്നത് നേട്ടമാണ്. കൂടാതെ വിവിധ രാജ്യങ്ങളിൽ ബിസിനസ് ചെയ്യുന്നവർക്കും കുടുംബത്തെ സ്ഥിരമായി യുഎഇയിൽ നിർത്താൻ ആഗ്രഹിക്കാത്തവർക്കും ഈ വീസ ഗുണം ചെയ്യും.
വിദഗ്ധർ, ഫ്രീലാൻസർ, സ്വയം തൊഴിൽ ചെയ്യുന്നവർ എന്നിവർക്ക് അനുയോജ്യമായ വിസയാണ് പുതിയ ഗ്രീൻ റസിഡൻസി വിസ. അതേസമയം ബിരുദധാരികൾക്ക് ജോലി നോക്കാനുള്ള ജോബ് എക്സ്പ്ലൊറേഷൻ വിസയും പ്രാബല്യത്തിൽ വന്നു. നാലുമാസം വരെ കാലപരിധിയിൽ ജോബ് വിസ സ്വന്തമാക്കാം. ഇ വിസ പ്രാബല്യത്തിൽ ആയതോടെ സ്വന്തമായി വിസക്ക് അപേക്ഷിക്കാമെന്നതും നേട്ടമാണ്. രക്ഷിതാക്കൾക്ക് ആൺകുട്ടികളെ സ്പോൺസർ ചെയ്യാവുന്ന പ്രായപരിധി 25 വയസ്സാക്കിയതും, വിവാഹിതരല്ലാത്ത പെൺകുട്ടികളെയും ഭിന്നശേഷിക്കാരെയും പ്രായപരിധി പരിഗണിക്കാതെ രക്ഷിതാക്കളുടെ സ്പോൺസർഷിപ്പിൽ യുഎഇയിൽ നിർത്താമെന്നതും പ്രാബല്യത്തിലായി .
നേരത്തെ നിക്ഷേപകർ, വിവിധ മേഖലകളിലെ വിദഗ്ധർ, മികവു പുലർത്തുന്ന വിദ്യാർഥികൾ എന്നിവർക്കാണ് ദീർഘകാല വീസ നൽകിയിരുന്നത്. ഇവരുടെ കുടുംബാംഗങ്ങൾക്കും തുല്യ കാലയളവിൽ വീസ ലഭിക്കുമെന്ന് ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്, കസ്റ്റംസ്, പോർട്ട് സെക്യൂരിറ്റി (ഐസിപി) അറിയിച്ചു
