ഡൽഹിയിൽ ഇന്നലെ നടന്ന ലഹരി വേട്ടയുമായി ബന്ധപ്പെട്ട് രണ്ടുപേർ കൂടി അറസ്റ്റിൽ. ഇന്ത്യൻ വംശജരായ രണ്ട് യുകെ പൗരന്മാരാണ് അറസ്റ്റിലായത്. നിശാ പാർട്ടികൾക്കും സംഗീത വിരുന്നുകൾക്കും വേണ്ടിയാണ് ലഹരി മരുന്നുകൾ കൊണ്ടുവന്നത്. വിനോദ മേഖലയിലെ വലിയ പേരുകൾ പുറത്തു വരാനുണ്ടെന്നാണ് ഡൽഹി പോലീസ് സെപ്ഷ്യൽ സെൽ അറിയിച്ചിരിക്കുന്നത്.
കഴിഞ്ഞ ഒരു മാസത്തിനുള്ളിൽ വലിയ ലഹരി വേട്ടയാണ് ഡൽഹി പോലീസ് സെപ്ഷ്യൽ സെല്ലിന്റെ നേതൃത്വത്തിൽ നടപ്പിലാക്കിയത്. 2000 കോടി വിലവരുന്ന കൊക്കെയ്ൻ ഇന്നലെ പോലീസ് പിടിച്ചെടുത്തിരുന്നു. ഡൽഹിയിൽ നിന്ന് ഗോവ, മുംബൈ തുടങ്ങിയ തെക്കേ ഇന്ത്യൻ സംസ്ഥാനങ്ങളിലേക്ക് ലഹരി കടത്താനുള്ള നീക്കമായിരുന്നുവെന്ന് പോലീസ് പറഞ്ഞു.
ദുബായ് കേന്ദ്രീകരിച്ച് പ്രവർത്തിക്കുന്ന വീരേന്ദ്ര ബസോയി ആണ് ലഹരി കടത്തിന്റെ കിങ് പിൻ എന്ന് പോലീസ് അറിയിച്ചു. കഴിഞ്ഞ ദിവസം നാലുപേരെ പോലീസ് അറസ്റ്റ് ചെയ്തിരുന്നു.
