ദക്ഷിണേന്ത്യയിലേക്ക് വീണ്ടും വന്ദേ ഭാരത് ട്രെയിനുകൾ കൂടി എത്തുന്നു. വരുന്ന ഏപ്രിൽ മാസത്തിൽ തമിഴ്‌നാട്ടിലേക്ക് വന്ദേഭാരത് അടക്കം രണ്ട് എക്‌സ്പ്രസ് ട്രെയിനുകളാണ് പ്രധാനമന്ത്രി നരേന്ദ്രമോദി ഉദ്ഘാടനം ചെയ്യുക. ചെന്നൈയിൽ നിന്നും കോയമ്പത്തൂരിലേക്ക് ഒരു വന്ദേഭാരത് എക്‌സ്പ്രസും താമ്പരത്ത് നിന്നും ചെങ്കോട്ടയിലേക്ക് ആഴ്ചയിലുള്ള ആഴ്ചയിൽ മൂന്ന് സർവീസുകളുള്ള എക്‌സ്പ്രസുമാണ് പുതുതായി സർവീസ് നടത്താൻ ഒരുങ്ങുന്നത്.
ഏറ്റവും ഒടുവിൽ പുറത്തുവരുന്ന റിപ്പോർട്ട് അനുസരിച്ച് ഏപ്രിൽ എട്ടിന് പ്രധാനമന്ത്രി നരേന്ദ്ര മോദി ഈ സേവനങ്ങൾ ഫ്‌ലാഗ് ഓഫ് ചെയ്യും. രണ്ട് ട്രെയിനുകളും കേരളത്തിന്റെ അതിർത്തി വരെ എത്തി നിൽക്കുന്നുവെന്നതാണ് മറ്റൊരു പ്രത്യേകത. അതേസമയം, കേരളത്തിലേക്ക് ഇതുവരെ വന്ദേഭാരത് ട്രെയിൻ എത്തിയിട്ടില്ലെന്നതും ശ്രദ്ധേയമായ കാര്യമാണ്.
തമിഴ്‌നാട് തലസ്ഥാനമായ ചെന്നൈയിൽ നിന്നും തിരക്കേറിയ ഈ രണ്ട് റൂട്ടുകളിൽ പുതിയ ട്രെയിനുകൾ എത്തുന്നതോടെ യാത്രക്കാർക്ക് ഏറെ ആശ്വാസമാണ് ഉണ്ടാകുക.
