ഇന്ന് സംസ്ഥാനത്തെ ജില്ലാ പൊലീസ് ആസ്ഥാനങ്ങളിലേക്ക് കോൺഗ്രസ് പ്രവർത്തകർ നടത്തിയ മാർച്ചിന് നേരെ പൊലീസ് നടത്തിയത് നരനായാട്ടെന്ന് പ്രതിപക്ഷ നേതാവ് വി.ഡി സതീശൻ. സ്ത്രീകൾ ഉൾപ്പടെയുള്ളവരെ പൊലീസ് തല്ലിച്ചതച്ചു. മുഖ്യമന്ത്രിയും സിപിഎമ്മിന്റെ ഇഷ്ടക്കാരും നടത്തുന്ന പകൽകൊള്ളയും കമ്മീഷൻ ഇടപാടുകളും അധികാര ദുർവിനിയോഗവും ചോദ്യം ചെയ്തതിലുള്ള വിരോധം തീർക്കുന്നതിന് വേണ്ടി പൊലീസിനെ ദുരുപയോഗം ചെയ്യുന്നത് നിയമ വിരുദ്ധമാണെന്ന് സതീശൻ പറഞ്ഞു. മുഖ്യമന്ത്രിയുടേയും സിപിഎമ്മിന്റേയും ഗുണ്ടാസംഘമായി പൊലീസ് സേനയിലെ ഒരു വിഭാഗം മാറുന്നത് മുഴുവൻ പൊലീസ് സേനയുടെ അന്തസിനെ കെടുത്തുമെന്നും അദ്ദേഹം കുറ്റപ്പെടുത്തി. സമാധാനമായി പ്രതിഷേധിച്ച പ്രവർത്തകർക്ക് നേരെയാണ് പൊലീസ് അക്രമം അഴിച്ച് വിട്ടതെന്നും അദ്ദേഹം കൂട്ടിച്ചേർത്തു.
കൊല്ലത്തും കാസർഗോഡും മലപ്പുറത്തും പൊലീസ് ലാത്തി വീശി. കാസർഗോഡ് ഡിസിസി അധ്യക്ഷൻ പി.കെ ഫൈസലിന്റെ തലയ്ക്ക് ലാത്തി ചാർജിൽ പരുക്കേറ്റു. വിവിധ ജില്ലകളിലായി കോൺഗ്രസ് നടത്തിയ പ്രതിഷേധത്തിൽ പങ്കെടുത്ത നിരവധി പ്രവർത്തകർക്കും പരുക്കേറ്റു.
സംസ്ഥാനത്ത് മുഖ്യമന്ത്രിക്കും സിപിഐഎം-സംഘപരിവാർ നേതാക്കൾക്കും ഒരു നീതിയും കോൺഗ്രസ് യുഡിഎഫ് നേതാക്കൾക്ക് മറ്റൊരു നീതിയും ആണെന്ന് പ്രതിപക്ഷ നേതാവ് പറഞ്ഞു. ജനാധിപത്യ സംവിധാനത്തിൽ ഇരട്ട നീതിയെന്നത് ഫാസിസ്റ്റ് ശൈലിയാണ്. മോദിയെ അനുകരിക്കുന്ന പിണറായി വിജയൻ അതുതന്നെയാണ് കേരളത്തിലും നടപ്പാക്കുന്നതെന്നും അദ്ദേഹം കൂട്ടിച്ചേർത്തു.
