ചാണ്ടി ഉമ്മൻ സ്വർണ നൂലിൽ കെട്ടിയിറക്കിയ ആളല്ലെന്ന് പ്രതിപക്ഷ നേതാവ് വിഡി സതീശൻ. മുൻമുഖ്യമന്ത്രി ഉമ്മൻചാണ്ടിയുടെ മകനായതുകൊണ്ട് അവസരം കിട്ടാതെ പോയ ആളാണ് ചാണ്ടി ഉമ്മനെന്ന് അദ്ദേഹം ഒരു സ്വകാര്യ ചാനലിനോട് പറഞ്ഞു. ഉമ്മൻചാണ്ടിയുടെ കുടുംബത്തെ അപമാനിക്കാൻ സി പി എം ശ്രമിക്കുന്നുണ്ടെന്നും വി ഡി സതീശൻ ആരോപിച്ചു. സി പി എം വിഭ്രാന്തിയിലാണെന്നും ഉമ്മൻചാണ്ടിയുടെ ചികിത്സാ വിവാദം ഉയർത്താൻ ശ്രമിക്കുന്നത് അതുകൊണ്ടാണെന്നും സതീശൻ പറഞ്ഞു.
സി പി എമ്മും സി പി ഐയും കുടുംബാംഗങ്ങൾക്കാണ് പ്രാധാന്യം കൊടുക്കുന്നതെന്നും സതീശൻ വിമർശിച്ചു. ‘കോൺഗ്രസിലെ യുവജന നിരയിൽ മുന്നിൽ നിൽക്കുന്ന ആളാണ് ചാണ്ടി ഉമ്മൻ. ഒരുപക്ഷേ ഉമ്മൻചാണ്ടിയുടെ മകനായതുകൊണ്ടാകാം അദ്ദേഹത്തിന് അവസരം കിട്ടാതെ പോയത്. മൂന്നാംകിട ആരോപണം ഉന്നയിച്ച് അയാളെ അപമാനിക്കുകയാണ്, കുടുംബത്തെ അപമാനിക്കുകയാണ്, ഉമ്മൻചാണ്ടിയെ അപമാനിക്കുകയാണ്.’- വി ഡി സതീശൻ പറയുന്നു.
