സംസ്ഥാനത്ത് മഴശക്തി പ്രാപിച്ച തോടുകൂടി കോട്ടയം ജില്ലയിലെ താലൂക്കുകളിൽ സ്കൂളുകള്‍ക്കും അങ്കണവാടികള്‍ക്കും ഇന്ന് അവധി പ്രഖ്യാപിച്ചു. വൈക്കം, ചങ്ങനാശ്ശേരി താലൂക്കുകളിലെ ക്യാമ്ബുകള്‍ പ്രവര്‍ത്തിക്കുന്ന സ്കൂളുകള്‍ക്കും ജില്ലാ കളക്ടര്‍ അവധി പ്രഖ്യാപിച്ചിട്ടുണ്ട്.
ഹയര്‍സെക്കൻഡറി തലം വരെയുള്ള വിദ്യാഭ്യാസ സ്ഥാപനങ്ങള്‍ക്കാണ് അവധി. കോട്ടയം താലൂക്കില്‍ 15, വൈക്കം ചങ്ങനാശ്ശേരി താലൂക്കുകളില്‍ ഓരോ ക്യാമ്ബുകളും ആണ് പ്രവര്‍ത്തിക്കുന്നത്. താഴ്ന്ന പ്രദേശങ്ങളില്‍ വെള്ളം കയറിയതിനെ തുടര്‍ന്ന് 67 കുടുംബങ്ങളിലെ 239 പേരാണ് ക്യാമ്ബുകളില്‍ ഉള്ളത്. ഈ മാസം അഞ്ചുവരെ ജില്ലയില്‍ ഖനന നിരോധനവും മലയോരമേഖലകളിലേക്കുള്ള രാത്രി യാത്രയ്ക്ക് നിയന്ത്രണവും ജില്ലാ ഭരണകൂടം ഏര്‍പ്പെടുത്തിയിട്ടുണ്ട്. കോട്ടയത്ത് എവിടെയും രാത്രിയില്‍ കാര്യമായ മഴ ഉണ്ടായിരുന്നില്ല. രാവിലെയും മഴ മാറി നില്‍ക്കുന്നു. ജില്ലയില്‍ ഇന്ന് ഗ്രീൻ അലര്‍ട്ടുമാണ് .
ആലപ്പുഴയിലെ രണ്ട് താലൂക്കുകളിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി പ്രഖ്യാപിച്ചിട്ടുണ്ട്. ജില്ലയില്‍ മൂന്നു ദിവസമായി പെയ്യുന്ന ശക്തമായ മഴയെത്തുടര്‍ന്ന് വെള്ളക്കെട്ടുണ്ടായ പ്രദേശങ്ങളില്‍ നിന്ന് ആളുകളെ ദുരിതാശ്വാസ ക്യാമ്ബുകളിലേക്ക് മാറ്റിയ സാഹചര്യത്തിലാണ് നടപടി. ജില്ലയിലെ ദുരിതാശ്വാസ ക്യാമ്ബുകള്‍ പ്രവര്‍ത്തിക്കുന്ന ചേര്‍ത്തല, ചെങ്ങന്നൂര്‍ താലൂക്കുകളിലെ വിദ്യാഭ്യാസസ്ഥാപനങ്ങള്‍ക്കാണ് ചൊവ്വാഴ്ച ( 03.10.2023) അവധി പ്രഖ്യാപിച്ചിട്ടുള്ളതെന്ന് ജില്ലാ കളക്ടര്‍ ഫേസ്ബുക്ക് പേജില്‍ അറിയച്ചു.
അതേസമയം സംസ്ഥാനത്ത് വിവിധ ജില്ലകളില്‍ മഴ തുടരുകയാണ്. തലസ്ഥാനമടക്കുമുള്ള തെക്കൻ കേരളത്തില്‍ ഇന്നലെ ശക്തമായ മഴ ലഭിച്ചിരുന്നു. മധ്യകിഴക്കൻ അറബിക്കടലില്‍ സ്ഥിതി ചെയ്തിരുന്ന തീവ്ര ന്യൂനമര്‍ദ്ദം കരതൊട്ടതിന് പിന്നാലെ ആയിരുന്നു സംസ്ഥാനത്ത് മഴ ശക്തമായത്. രാവിലെ മുതല്‍ ആരംഭിച്ച മഴ തലസ്ഥാന ജില്ലയിലെ മലയോര, നഗരമേഖലകളില്‍ ശക്തമായി തുടരുകയാണ്.
