ഹിറ്റ് പാട്ടുകള്‍ ലാല്‍ ജോസ് സിനിമയുടെ പ്രത്യേകതകളാണ്; കാരണം വെളിപ്പെടുത്തി ലാല്‍ ജോസ്
ലാല്‍ ജോസ് ജനപ്രിയ സംവിധായകനാണ്. വ്യത്യസ്തമായ ശൈലിയിലൂടെ, വിഷയവൈവിധ്യങ്ങളിലൂടെ മലയാളികളുടെ മനസില്‍ ഇടം നേടിയ ചലച്ചിത്രകാരന്‍. മഹാവിജയങ്ങളും പരാജയങ്ങളുമൊക്കെ ചേര്‍ന്നതാണ് ലാല്‍ ജോസ് എന്ന സംവിധായകന്റെ ജീവിതം. ഹിറ്റ് പാട്ടുകള്‍ ലാല്‍ ജോസ് സിനിമയുടെ പ്രത്യേകതകളാണ്. തന്റെ സിനിമയിലെ പാട്ടുകളെക്കുറിച്ചു പറയുകയാണ് അദ്ദേഹം.
എന്റെ സിനിമകളില്‍ ഹിറ്റ് പാട്ടുകളുണ്ടാകാന്‍ കാരണം എനിക്ക് സംഗീതമറിയില്ല എന്നതാണ്. സംഗീതമറിയാത്തതുകൊണ്ട് മ്യൂസിക് ഡയറക്ടറോട് ഭൂപാളത്തിലൊന്നു പിടിക്കൂ...നമുക്ക് കല്യാണിയിലൊന്നു നോക്കാം എന്നൊന്നും പറയാറില്ല. ഞാന്‍ സംഗീതം പഠിച്ചിട്ടില്ല. പണ്ട് പള്ളി ക്വയറില്‍ ഗിറ്റാര്‍ വായിച്ചിട്ടുണ്ട് എന്നല്ലാതെ സംഗീതവുമായി ബന്ധമില്ല. മ്യൂസിക് ഡയറക്ടര്‍ക്ക് പൂര്‍ണ സ്വാതന്ത്ര്യം കൊടുക്കും. അപ്പോള്‍ ഏറ്റവും മികച്ചത് നല്‍കി അവരെന്നെ സന്തോഷിപ്പിക്കാന്‍ ശ്രമിക്കും. സിറ്റുവേഷന്‍ കൃത്യമായി സംഗീത സംവിധായകനു പറഞ്ഞുകൊടുക്കും.
വിവിധ സംഗീതസംവിധായകരോടൊപ്പം വര്‍ക്ക് ചെയ്തിട്ടുണ്ട്. സംഗീത സംവിധായകര്‍ക്ക് അറിയാം ഏറ്റവും മികച്ചതിനു മാത്രമേ എന്നെ സന്തോഷിപ്പിക്കാന്‍ കഴിയൂ എന്ന്. അതുകൊണ്ട് അവര്‍ ഏറ്റവും മികച്ചത് എനിക്കു തരുന്നു- ലാല്‍ ജോസ് പറഞ്ഞു.