'പലതും വിചാരിച്ചതുപോലെയല്ല നടന്നത്; തോൽവി അംഗീകരിക്കുന്നു': തുറന്നുപറഞ്ഞ് സാമന്ത
നിരവധി വിജയചിത്രങ്ങളുമായി തെന്നിന്ത്യയിലെ സൂപ്പര്‍ഹിറ്റ് നായികയായുള്ള വളര്‍ച്ചയ്ക്കിടയിലും അപ്രതീക്ഷിതമായ ചില തിരിച്ചടികള്‍ കരിയറിലും ജീവിതത്തിലും നേരിടേണ്ടിവന്ന താരമാണ് സാമന്ത. എന്നാല്‍ രോഗത്തിനും പരാജയങ്ങള്‍ക്ക് മുന്നിലും തളരാതെ കരുത്തോടെ മുന്നേറണമെന്നാണ് തന്റെ ജീവിതം കൊണ്ട് സാമന്ത പഠിപ്പിക്കുന്നത്. ഇപ്പോഴിതാ കരിയറിനെക്കുറിച്ച് ചില തുറന്നുപറച്ചിലുകള്‍ നടത്തിയിരിക്കുകയാണ് സാമന്ത.
സാമന്ത കേന്ദ്രകഥാപാത്രമായെത്തുന്ന സിറ്റാഡല്‍: ഹണി ബണ്ണി എന്ന ആക്ഷന്‍ ടിവി സീരീസ് പുറത്തിറങ്ങാനിരിക്കുകയാണ്. ഇന്‍സ്റ്റഗ്രാമിലെ ആസ്‌കി മീ എനിതിങ്ങ് സെഷനിടയില്‍ തന്റെ ഫോളേവേഴ്‌സിന്റെ ചോദ്യങ്ങള്‍ക്ക് ഉത്തരം നല്‍കുന്നതിനിടെയാണ് തന്റെ കരിയറിനെ കുറിച്ചും സാമന്ത മനസ്സുതുറന്നത്.
സിറ്റാഡലിനു വേണ്ടിയുള്ള പ്രവര്‍ത്തനം എങ്ങനെയായിരുന്നുവെന്നും കഥാപാത്രത്തിന്റെ സവിശേഷതകള്‍ എന്താണെന്നും ഒരാള്‍ ചോദിച്ചു. അതിനു മറുപടിയായാണ് താരം കരിയറിനെ കുറിച്ച് പറഞ്ഞത്. ഞാന്‍ തിരഞ്ഞെടുക്കുന്ന ഓരോ റോളുകളും എന്നെതന്നെ വെല്ലുവിളിക്കുന്നതാവണമെന്നും ഓരോ വെല്ലുവിളികളും കഴിഞ്ഞതിനേക്കാള്‍ പ്രയാസമേറിയതാവണമെന്നും ഞാന്‍ സ്വയം വാഗ്ദാനം നല്‍കിയിട്ടുണ്ട്. ശരിയാണ് മുന്‍കാലങ്ങളില്‍ എനിക്ക് തെറ്റുകള്‍ പറ്റി. പല കാര്യങ്ങളും വിചാരിച്ചതുപോലെ നടന്നില്ല. ഞാന്‍ തോല്‍വി സമ്മതിക്കുന്നു. കഴിഞ്ഞ കുറച്ചു സിനിമകളില്‍ എന്റെ പ്രകടനം മികച്ചതല്ലായെന്നത് ഞാന്‍ സമ്മതിക്കുകയാണ്, സാമന്ത പറഞ്ഞു.
കെ കെ മേനോന്‍, സാഖിബ് സലീം, സിക്കന്ദര്‍ ഖേര്‍, തുടങ്ങിയ താരങ്ങള്‍ അണിനിരക്കുന്ന സിറ്റാഡെല്‍: ഹണി ബണ്ണി നവംബര്‍ ഏഴിന് പ്രൈം വീഡിയോയില്‍ റിലീസ് ചെയ്യും. യെ മായാ ചേസാവേ, ഈഗ, നീതാനെ എന്‍ പൊന്‍വസന്തം, മഹാനടി, സൂപ്പര്‍ ഡീലക്സ് പോലുള്ള തമിഴ്, തെലുങ്ക് ചിത്രങ്ങളിലൂടെ ശ്രദ്ധേയയാണ് സാമന്ത. രാജ് നിദിമോരുവും കൃഷ്ണ ഡികെയും തന്നെ സംവിധാനം ചെയ്ത 'ഫാമിലി മാന്‍ 2' എന്ന ഹിന്ദി സീരീസിലൂടെയാണ് സാമന്ത ബോളിവുഡിലേക്ക് രംഗപ്രവേശം ചെയ്യുന്നത്.