'മനസിൽ ഒരുപാട് ശൂന്യത തോന്നി, മാനസികമായി അത്രയധികം വലിച്ചെടുത്ത സിനിമയായിരുന്നു‌; ഭൂതകാലം പോലൊരു സിനിമ ഇനി ചെയ്യില്ല'; ഷെയിൻ നി​ഗം

മലയാള സിനിമയിൽ യുവനിരയിൽ ശ്രദ്ധേയനാണ് ഷെയിൻ നി​ഗം. കരിയറിൽ വലിയ വിവാദങ്ങൾ വന്നത് ഒരു പരിധി വരെ ബാധിച്ചെങ്കിലും ഇന്നും ഷെയിൻ നി​ഗത്തെ തേടി മികച്ച സിനിമകളെത്തുന്നുണ്ട്. ഷെയിൻ നി​ഗത്തിന്റെ ശ്രദ്ധേ സിനിമകളിലൊന്നാണ് 2022 ൽ പുറത്തിറങ്ങിയ ഭൂതകാലം. രാഹുൽ സദാശിവൻ സംവിധാനം ചെയ്ത ചിത്രം അൻവർ റഷീദും ഷെയിൻ നി​ഗവും ചേർന്നാണ് നിർമ്മിച്ചത്. രേവതിയാണ് ഷെയിനിനൊപ്പം ഭൂതകാലത്തിൽ പ്രധാന വേഷം ചെയ്തത്. മികച്ച നടിക്കുള്ള സംസ്ഥാന പുരസ്കാരവും രേവതിക്ക് ലഭിച്ചു.

സിനിമയെക്കുറിച്ച് സംസാരിക്കുകയാണിപ്പോൾ ഷെയിൻ നി​ഗം. ഇനി ഭൂതകാലം പോലെയൊരു സിനിമ ചെയ്യില്ലെന്ന് നടൻ പറയുന്നു. ദ ഹിന്ദുവിനോടാണ് പ്രതികരണം. ഭൂതകാലത്തിലെ സീനുകൾ മാനസികമായി തന്നെ തളർത്തിയിരുന്നെന്ന് ഷെയിൻ നി​ഗം പറയുന്നു. ഇമോഷണലി ഞങ്ങൾ തളർന്നു. ഒരുപാട് മെന്റൽ, സൈക്കളോജിക്കൽ പ്രശ്നങ്ങളുള്ള കഥാപാത്രങ്ങൾ ഇനി ചെയ്യാതിരിക്കുന്നതിനെക്കുറിച്ച് ആലോചിക്കുന്നുണ്ട്. ഭൂതകാലം ചെയ്യുമ്പോൾ ഞാൻ ആസ്വദിച്ചിരുന്നു. പക്ഷെ അതിന് ശേഷം എന്റെ യഥാർത്ഥ ജീവിതത്തിൽ ഒന്നുമില്ലെന്ന് തോന്നി. ക്യാരക്ടറിലേക്ക് തിരിച്ച് പോകാൻ പറ്റില്ല, ഷെയിൻ നി​ഗം ആകണം.

അത് ബുദ്ധിമുട്ടായിരുന്നെന്ന് നടൻ വ്യക്തമാക്കി. മനസിൽ ഒരുപാട് ശൂന്യത തോന്നി. മാനസികമായി അത്രയധികം വലിച്ചെടുത്ത സിനിമയായിരുന്നു ഭൂതകാലമെന്നും ഷെയിൻ നി​ഗം പറഞ്ഞു. ഒരേസമയം തനിക്ക് ഒന്നിലേറെ സിനിമകൾ ചെയ്യാനാകില്ലെന്നും ഷെയിൻ നി​ഗം പറയുന്നു. ഞാനതിന് ശ്രമിച്ചതാണ്. എന്നാൽ ദയനീയമായി പരാജയപ്പെട്ടു.

വെയിൽ എന്ന സിനിമ ചെയ്യുമ്പോഴാണ് ഞാൻ ശ്രമിച്ചത്. കുർബാനി എന്ന സിനിമയ്ക്കിടെയാണ് അത് ഷൂട്ട് ചെയ്തത്. രണ്ട് സിനിമകളും ഒരുമിച്ച് ചെയ്യാൻ താനേറെ പ്രയാസപ്പെട്ടെന്നും ഷെയിൻ നി​ഗം പറഞ്ഞു. മദ്രാസ്കാരനാണ് ഷെയിൻ നി​ഗത്തിന്റെ പുതിയ സിനിമ. തമിഴ് ചിത്രത്തിന്റെ പ്രൊമോഷൻ തിരക്കുകളിലാണ് നടൻ.