ക്ലോഡ് 3.5 സോണറ്റ്, പുതിയ എഐ മോഡൽ അവതരിപ്പിച്ച് ആന്ത്രോപിക്ക്; ജിപിടി 4ഒ-യേക്കാളും, ജെമിനൈ 1.5 പ്രോയേക്കാളും മികച്ചതെന്ന് കമ്പനി

ക്ലോഡ് 3.5 സോണറ്റ് എന്ന പുതിയ എഐ മോഡൽ പുറത്തിറക്കിയിരിക്കുകയാണ് ആന്ത്രോപിക്ക്. ഇത് ഓപ്പണ്‍ എഐയുടെ ജിപിടി 4ഒ-യേക്കാളും ഗൂഗിളിന്റെ ജെമിനൈ 1.5 പ്രോയേക്കാളും മികച്ചതാണെന്നാണ് കമ്പനിയുടെ അവകാശവാദം. മുന്‍ ഓപ്പണ്‍ എഐ ഗവേഷകരാണ് ആന്ത്രോപിക്കിന് തുടക്കമിട്ടത്. ഗൂഗിള്‍, ആമസോണ്‍ ഉള്‍പ്പടെയുള്ള കമ്പനികളാണ് ഈ സ്ഥാപനത്തിന് സാമ്പത്തിക പിന്തുണ നൽകുന്നത്. ഇതിനകം തന്നെ ക്ലോഡ് ജനപ്രീതി നേടി കഴി‍ഞ്ഞു.

ക്ലോഡ് 3.5 സോണറ്റ് ഐഒഎസിലും, വെബ് പ്ലാറ്റ്‌ഫോമിലും ലഭ്യമാണ്. ഹൈക്കു, ഓപ്പസ്, സോണറ്റ് എന്നിങ്ങനെ മൂന്ന് പതിപ്പുകളാണ് പ്രവര്‍ത്തന ശേഷിയുടെ അടിസ്ഥാനത്തില്‍ ക്ലോഡിനുള്ളത്. ഇതില്‍ ആന്ത്രോപിക്കിന്റെ ക്ലോഡ് 3 ശ്രേണിയിലെ ഏറ്റവും ബുദ്ധിയുള്ള എഐ മോഡലാണ് ക്ലോഡ് 3.5 സോണറ്റ്. കാര്യങ്ങള്‍ വിശകലനം ചെയ്യാനും പരിഹാരം കാണാനും ഇതിന് കഴിവ് കൂടുതലാണെന്നാണ് കമ്പനി പറയ്യുന്നത്.

വേഗത്തിലും പ്രവര്‍ത്തനമികവിലും ക്ലോഡ് 3 ഓപ്പസിനേക്കാള്‍ മികച്ചതാണ് ക്ലോഡ് 3.5 സോണറ്റ് എന്നാണ് ആന്ത്രോപിക്ക് പറയുന്നത്. എഴുത്ത്, ചാര്‍ട്ടുകളും ഗ്രാഫുകളും വ്യാഖ്യാനിക്കുക, തര്‍ജ്ജമ, കോഡിങ്, ചിത്രങ്ങളില്‍നിന്ന് വാക്കുകള്‍ വേര്‍തിരിച്ചെടുക്കുക തുടങ്ങിയ വിവിധ കാര്യങ്ങളില്‍ ക്ലോഡ് 3.5 സോണറ്റ് മികവു കാട്ടുന്നു എന്നാണ് കമ്പനി പറയുന്നത്.