ഇന്ന് (മെയ് 4), International Firefighters' Day അഥവാ 'അന്താരാഷ്ട്ര അഗ്‌നിശമനസേനാദിനം' വിവിധ രാജ്യങ്ങൾ ആചരിക്കുന്നു. തീപ്പിടുത്തത്തിൽ അകപ്പെടുന്ന മനുഷ്യരുടെയും മൃഗങ്ങളുടെയും ജീവൻ രക്ഷിക്കാൻ തങ്ങളുടെ സുരക്ഷാ പോലും മറന്ന് ഓടിയെത്തുന്ന അഗ്‌നിശമന സേനാംഗങ്ങളെ ആദരിക്കുകയാണ് ഈ ദിനാചരണത്തിന്റെ ലക്ഷ്യം. ഓസ്ട്രേലിയയിൽ 1998 ഡിസംബർ 2-ന് പടർന്ന കാട്ടുതീ അണയ്ക്കാൻ പോയ അഞ്ച് അഗ്‌നിശമന സേനാംഗങ്ങൾ പൊള്ളലേറ്റ് മരണപ്പെട്ടതാണ് ഈ ദിനാചരണത്തിന് കാരണമായ സംഭവം. തുടർന്ന് 1999 മുതൽ, വിവിധ ലോകരാജ്യങ്ങൾ 'അന്താരാഷ്ട്ര അഗ്‌നിശമനസേനാദിനം' ആചരിച്ചുവരുന്നു.
ഇന്നേദിനം ഗൾഫിലെ, പ്രത്യേകിച്ച് ദുബായിലെ പ്രവാസി മലയാളികൾ നന്ദിയോടെ അനുസ്മരിക്കേണ്ട ഒരു എമിറാത്തി പൗരനുണ്ട്. നൂറുകണക്കിന് മലയാളികളെ തീയിൽനിന്ന് രക്ഷിക്കാനായി സ്വന്തം ജീവൻ ത്യാഗം ചെയ്ത ആ ധീരന്റെ പേര് ജാസിം ഇസ്സ മുഹമ്മദ് ഹസ്സൻ അൽ ബലൂഷി. അദ്ദേഹം യു.എ.ഇയിലെ പരിചയസമ്പന്നനായ ഒരു അഗ്‌നിശമനസേനാംഗം ആയിരുന്നു. 2016 ആഗസ്റ്റ് 3 ന്, തിരുവനന്തപുരം - ദുബായ് EK 521 എമിറേറ്റ്‌സ് വിമാനത്തിന്, ദുബായ് അന്താരാഷ്ട്ര വിമാനത്താവളത്തിൽ വെച്ച്, ക്രാഷ് ലാൻഡ് ചെയ്യുന്നതിനിടെ തീപിടിച്ചു. പ്രാദേശിക സമയം ഉച്ചയ്ക്ക് 12.45നാണ് സംഭവം. 282 യാത്രക്കാർ വിമാനത്തിലുണ്ട്. ഭൂരിഭാഗവും മലയാളികൾ. ഏതു സമയവും തീ ആളിക്കത്താവുന്ന ആ വിമാനത്തിൽനിന്ന്, യാത്രികരെയും ഫ്‌ലൈറ്റ് ക്രൂവിനെയും സുരക്ഷിതമായി പുറത്തെത്തിക്കാൻ മുൻപന്തിയിൽനിന്ന അഗ്‌നിശമനസേനാംഗമാണ് ജാസിം ഇസ്സ മുഹമ്മദ്. അവസാന യാത്രികനും പുറത്തിറങ്ങി ഏതാനും നിമിഷങ്ങൾക്കുള്ളിൽ വിമാനത്തിൽ തീ പടർന്നു. അപ്പോഴും യാത്രികരുടെ ജീവന് പ്രാധാന്യം നൽകി ആ ധീരൻ. ആ വിമാന അപകടത്തിൽ യാത്രികർ എല്ലാവരും രക്ഷപെട്ടു.
എന്നാൽ, രക്ഷാപ്രവർത്തനത്തിനിടെ റാസൽഖൈമ സ്വദേശിയായ, ജാസിം ഇസ്സ മുഹമ്മദ് ഹസ്സൻ അൽ ബലൂഷി എന്ന എമിറാത്തി പൗരൻ വീരമൃത്യു വരിച്ചു. വെറും 27-ാം വയസ്സിലാണ് ജാസിം ഇസ്സ മുഹമ്മദ് നമ്മെ വിട്ടുപോയത്. 'അന്താരാഷ്ട്ര അഗ്‌നിശമനസേനാദിന'ത്തിൽ പ്രവാസികൾ ജാസിം ഇസ്സ മുഹമ്മദിനെ ഓർക്കുന്നത് ഒരു അനിവാര്യതയാണ്. കാരണം, ഗൾഫ് നാടിന്, അഥവാ തദ്ദേശീയർക്ക് പ്രവാസികളോടുള്ള സ്‌നേഹത്തിന്റെ പ്രതീകമാണ് ഇന്ന് ഈ പേര്: 'ജാസിം ഇസ്സ മുഹമ്മദ് ഹസ്സൻ അൽ ബലൂഷി.'