ആദ്യ സിനിമ സംവിധാനത്തിനൊരുങ്ങി എഡിറ്റർ സൈജു ശ്രീധരൻ; നായിക മഞ്ജു വാര്യർ
മഞ്ജു വാര്യരെ കേന്ദ്ര കഥാപാത്രമാക്കി ആദ്യ സിനിമ സംവിധാനത്തിനൊരുങ്ങി എഡിറ്റർ സൈജു ശ്രീധരൻ. മലയാളത്തില്‍ ആദ്യമായി ഫൗണ്ട് ഫൂട്ടേജ് രീതിയിൽ ചിത്രീകരിക്കുന്ന മുഴുനീള ചിത്രമായിരിക്കും ഇത്. സിനിമയുടെ കഥ പറയുന്ന സിനിമാറ്റിക് ടെക്നിക് രീതിയാണ് ഫൗണ്ട് ഫൂട്ടേജ്.
കുമ്പളങ്ങി നൈറ്റ്സ്, അഞ്ചാം പാതിരാ, മഹേഷിൻ്റെ പ്രതികാരം തുടങ്ങിയ ചിത്രങ്ങളുടെ എഡിറ്റർ ആയിരുന്നു സൈജു ശ്രീധരൻ. മാമുക്കോയ, നഞ്ചിയമ്മ എന്നിവരും ചിത്രത്തിൽ അഭിനയിക്കുന്നുണ്ട്. തൊടുപുഴയിലും പരിസരപ്രദേശങ്ങളിലുമാണ് സിനിമയുടെ ചിത്രീകരണം നടക്കുക. സംവിധാനത്തിന് പുറമെ രചനയും എഡിറ്റിംഗും സൈജു തന്നെയാണ്. ശബ്ന മുഹമ്മദുമായി ചേർന്നാണ് രചന നിർവഹിക്കുന്നത്.
മൂവി ബക്കറ്റ്, പെയിൽ ബ്ലൂ ഡോട്ട് ഫിലിംസ്, കാസ്റ്റ് ആൻഡ് കൊ എൻ്റർടെയ്ൻമെൻ്റ്സ് എന്നീ ബാനറുകളില്‍ ബിനീഷ് ചന്ദ്രൻ, സൈജു ശ്രീധരൻ എന്നിവർ ചേർന്നാണ് ഈ സിനിമ നിർമിക്കുന്നത്. സുഷിൻ ശ്യാം ആണ് സംഗീതവും പശ്ചാത്തല സംഗീതവും ഒരുക്കുന്നത്. കോ പ്രൊഡ്യുസർ രാഹുൽ രാജീവ്, സുരാജ് മേനോൻ, ആർട്ട് ഡയറക്ടർ അപ്പുണ്ണി സാജൻ, കോസ്റ്റ്യൂംസ് സമീറ സനീഷ്, ചമയം റോണക്സ് സേവ്യർ.