'എന്റെ അച്ഛനും അമ്മയും ഈ ചോദ്യം എന്നോട് ചോദിക്കാറില്ല, ഇപ്പോഴുള്ള എന്റെ ജീവിതത്തില്‍ ഞാന്‍ സന്തോഷവതിയാണ്': തമന്ന
നടിമാരോട് വിവാഹത്തെ കുറിച്ചും ചോദിക്കാന്‍ പാടില്ല എന്നുണ്ട്. മുപ്പത് കഴിഞ്ഞിട്ടും അവിവാഹിതരായി തുടരുന്ന ഒരുപാട് നടിമാര്‍ സൗത്ത് ഇന്ത്യന്‍ സിനിമയിലുണ്ട്. അതില്‍ ചിലര്‍ക്ക് വിവാഹം എന്ന് കേട്ടാല്‍ തന്നെ ദേഷ്യമാണ്. ആ കൂട്ടത്തിലാണോ തമന്നയും എന്ന് ചിന്തിക്കേണ്ടിയിരിക്കുന്നു.
കഴിഞ്ഞ ദിവസം ഒരു പരിപാടിയില്‍ വിവാഹത്തെ കുറിച്ച് ചോദിച്ച ചോദ്യം നടിയെ പ്രകോപിതയാക്കി. ഗലാട്ട ഓര്‍ഗനൈസ് ചെയ്ത ഒരു പരിപാടിയില്‍ പങ്കെടുക്കുന്നതിന് വേണ്ടിയാണ് കഴിഞ്ഞ ദിവസം തമന്ന ചെന്നൈയില്‍ എത്തിയത്. പരിപാടിയുടെ ഭാഗമായി ആരാധകരുമായി നടി നേരിട്ട് സംവദിയ്ക്കുന്ന ഒരു സെഗ്മെന്റ് ഉണ്ടായിരുന്നു. അതില്‍ പലരും താരത്തോട് കരിയര്‍ സംബന്ധിച്ച പല ചോദ്യങ്ങളും ചോദിച്ചു. എല്ലാ ചോദ്യത്തോടും സരസമായ രീതിയില്‍ വളരെ വ്യക്തമായി തന്നെ തമന്ന മറുപടി നല്‍കുയും ചെയ്തു. അതിനിടയില്‍ ഒരു പേഴ്‌സണല്‍ ചോദ്യം വന്നതാണ് തമന്നയെ ദേഷ്യം പിടിപ്പിച്ചത്.
വിവാഹത്തെ കുറിച്ചായിരുന്നു ചോദ്യം. എന്താണ് പ്ലാന്‍, എപ്പോഴാണ് വിവാഹം ഉണ്ടാവുക എന്ന ചോദ്യം തമന്നയ്ക്ക് ഒട്ടും സ്വീകരിക്കാന്‍ കഴിയുന്നതായിരുന്നില്ല. ഒറ്റവാക്കില്‍ അതിനുള്ള മറുപടി നല്‍കി താരം അവസാനിപ്പിച്ചു. 'എന്റെ അച്ഛനും അമ്മയും ഈ ചോദ്യം എന്നോട് ചോദിക്കാറില്ല, ഇപ്പോഴുള്ള എന്റെ ജീവിതത്തില്‍ ഞാന്‍ സന്തോഷവതിയാണ്' എന്ന് തമന്ന മറുപടി നല്‍കി.
അടുത്തിടെയാണ് തമന്ന താന്‍ പ്രണയത്തിലാണ് എന്ന് വെളിപ്പെടുത്തിയത്. ലസ്റ്റ് സ്റ്റോറീസ് ടു എന്ന വെബ് സീരീസിന്റെ പ്രമോഷനുമായി ബന്ധപ്പെട്ട പരിപാടിയിലാണ് കൂടെ അഭിനയിച്ച വിജയ് വര്‍മയുമായി താന്‍ പ്രണയത്തിലാണെന്ന് നടി പറഞ്ഞത്. അവന്‍ തന്റെ സന്തോഷത്തിന്റെ ഉറവിടമാണെന്ന് നടി പറഞ്ഞിരുന്നു. പിന്നെ എന്തിനാണ് ഇപ്പോള്‍ വിവാഹത്തെ സംബന്ധിച്ച ചോദ്യത്തിന് ഇത്ര ദേഷ്യം കാണിക്കുന്നത് എന്ന സംശയത്തിലാണ് ചിലര്‍.