വലിയ കോമ്പല്ല്; 2.5 മീറ്റർ നീളം; ഡൈനസോറുകൾക്ക് മുമ്പ് ജീവിച്ചിരുന്ന ഭീമൻ നീർപല്ലി
ഡൈനസോറുകൾക്കൊക്കെ മുമ്പ് ജലാശയങ്ങളെ വിറപ്പിച്ചിരുന്ന മറ്റൊരു ഭീകരൻ ഭൂമിയിൽ ഉണ്ടായിരുന്നെന്ന് ഈയിടെ ഗവേഷകർ കണ്ടെത്തി. ഒരു ഭീമൻ നീർപല്ലിയാണിത്. ആഫ്രിക്കൻ രാജ്യമായ നമീബിയയിൽ നിന്നാണ് ഗവേഷകർക്ക് 28 കോടി വർഷത്തോളം പഴക്കമുള്ള പല്ലിയുടെ ഫോസിൽ കിട്ടിയത്. ഗയാസിയ ജെന്ന്യെ എന്ന് ശാസ്ത്ര നാമമുള്ള ഈ ഫോസിലിന് ഏകദേശം 2.5 മീറ്റർ നീളമുണ്ട്. ടോയ്‌ലറ്റ് സീറ്റുകളുടെ ഷെയ്പ്പാണത്രെ ഇവയുടെ തലയ്ക്ക്. മാത്രമല്ല അന്നത്തെ ഏറ്റവും വലിയ വേട്ടക്കാരിലൊരാളായിരുന്ന ഇവയ്ക്ക് പേടിപ്പെടുത്തുന്ന കോമ്പല്ലുകളുമുണ്ടായിരുന്നെന്നും ഗവേഷകർ പറയുന്നു.
നമീബിയയിലെ ഗയ് അസ് ഘടനയിൽ നിന്നാണ് ഈ ഫോസിൽ കണ്ടെത്തിയത്. അങ്ങനെയാണ് ആ ശാസ്ത്രനാമവും വന്നത്. തലയോട്ടിയുടെ ഭാഗങ്ങളും നട്ടെല്ലുമടങ്ങുന്ന ഈ പല്ലികളുടെ നാല് ഭാഗിക ഫോസിലുകളാണ് കണ്ടെത്തിയിരിക്കുന്നത്. ഈ ജീവി ജീവിച്ചിരുന്ന കാലത്തെ ഭൂമിയുടെ ഘടനയ്ക്കും വ്യത്യാസമുണ്ടായിരുന്നു. അക്കാലത്ത് നമീബിയ കൂടുതൽ തെക്കോട്ടായിരുന്നു സ്ഥിതി ചെയ്തിരുന്നത്. ഇന്നത്തെ അന്‌റാർട്ടിക്കയുടെ വടക്കൻ ഭാഗത്തിനു തുല്യമായ നേർരേഖയിൽ ആയിരുന്നു ഇതിന്റെയും സ്ഥാനം.