അനുപം ഖേറിന്‍റെ ഓഫീസില്‍ മോഷണം നടന്നു. രണ്ടുപേരെ മുംബൈ പോലീസ് അറസ്റ്റ് ചെയ്തിട്ടുണ്ട്. ബുധനാഴ്ച രാത്രിയാണ് അനുപം ഖേറിന്‍റെ മുംബൈ ഓഫീസില്‍ മോഷണം നടന്നത്. ഇത് സംബന്ധിച്ച് അനുപം ഖേര്‍ ഒരു വീഡിയോ പോസ്റ്റ് ചെയ്തിട്ടുണ്ട്. മജീദ് ഷെയ്ഖ്, മുഹമ്മദ് ദലേർ ബഹ്‌രീം ഖാൻ എന്നീ രണ്ട് പേരെയാണ് മുംബൈ പോലീസ് അറസ്റ്റ് ചെയ്തിരിക്കുന്നത്. മുംബൈയിലെ ജോഗേശ്വരി മേഖലയിൽ നിന്നാണ് ഇരുവരേയും അറസ്റ്റ് ചെയ്തത് എന്നാണ് ലഭിക്കുന്ന വിവരം. പിടിയിലായ രണ്ടു പ്രതികളും സ്ഥിരം മോഷ്ടാക്കളാണ് എന്നാണ് പോലീസ് പറയുന്നത്.
മാത്രമല്ല ഇരുവരും ഓട്ടോയിൽ മുംബൈയുടെ വിവിധ ഭാഗങ്ങളിൽ കറങ്ങി മോഷണം നടത്തുന്നവരാണെന്നും പോലീസ് പറയുന്നു. അനുപം ഖേറിൻ്റെ ഓഫീസിൽ മോഷണം നടത്തിയ അതേ ദിവസം തന്നെ വിലെ പാർലെ മേഖലയിലും ഇവർ മോഷണം നടത്തിയിരുന്നു എന്നാണ് പോലീസ് വ്യക്തമാക്കുന്നത്.
അനുപം തൻ്റെ ഇൻസ്റ്റാഗ്രാം ഹാൻഡിൽ പങ്കുവച്ച വീഡിയോയില്‍ മുംബൈയിലെ തൻ്റെ ഓഫീസിൽ നിന്ന് പണവും ചില ഫിലിം നെഗറ്റീവുകളും മോഷ്ടിക്കപ്പെട്ടതായി അറിയിക്കുകയായിരുന്നു. കൂടാതെ ഇതോടൊപ്പം കേസിൻ്റെ മുഴുവൻ വിവരങ്ങളും അനുപം പങ്കുവെച്ചിരുന്നു.