'പുഷ്പ 2-ൽ തകർപ്പൻ പ്രകടനമാണ് ഫഫ, അഭിമാനിക്കാനുള്ള വകയുണ്ടെന്ന് ഉറപ്പുതരാം; അല്ലു അർജുൻ

പുഷ്പ 2-ൽ തകർപ്പൻ പ്രകടനമാണ് ഫഹദ് ഫാസിൽ കാഴ്ചവെച്ചിരിക്കുന്നതെന്നും എല്ലാ മലയാളികൾക്കും അദ്ദേഹത്തെ കുറിച്ചോർത്ത് അഭിമാനിക്കാമെന്നും നടൻ അല്ലു അർജുൻ. കൊച്ചിയിൽ നടന്ന സിനിമയുടെ പ്രൊമോഷൻ പരിപാടിക്കിടെയായിരുന്നു അല്ലു അർജുൻ ഫഹദിൻ്റെ പ്രകടനത്തെ പ്രശംസിച്ചത്. പുഷ്പ 2'ലെ ഒരു പാട്ടിന്‍റെ ഹൂക്ക് ലൈൻ ചിത്രം റിലീസാകുന്ന 6 ഭാഷകളിലും മലയാളത്തിലായിരിക്കുമെന്നും അല്ലു അർജുൻ വെളിപ്പെടുത്തി.

എല്ലാ മലയാളികള്‍ക്കും നമസ്‌കാരം. കേരളത്തിനോട് ദത്തുപുത്രനായ മല്ലു അര്‍ജുന്‍ സ്‌നേഹമറിയിക്കുകയാണ്. കേരളത്തിലേക്ക് വണ്ടി കയറുമ്പോള്‍ ഞാന്‍ സഹപ്രവര്‍ത്തകരോട് പറഞ്ഞത് എന്റെ സ്വന്തം നാടായ കേരളത്തിലേക്ക് സ്വാഗതമെന്നാണ്. കഴിഞ്ഞ 20 വര്‍ഷങ്ങളായി നിങ്ങളെനിക്ക് കണക്കറ്റ സ്‌നേഹം തന്നു. പുഷ്പയെന്ന ഈ സിനിമയ്ക്കായി മൂന്ന് വര്‍ഷത്തോളം നിങ്ങള്‍ കാത്തിരുന്നു. ഈ സ്‌നേഹത്തിന് നന്ദി പറയുകയാണ്. ഈ സിനിമ കുറേക്കാരണങ്ങളാല്‍ എനിക്ക് സ്‌പെഷ്യലാണ്. ആദ്യമായി മലയാളത്തിലെ വലിയ നടന്മാരിലൊരാളായ നമ്മുടെ സ്വന്തം ഫഫയോടൊപ്പം ഞാന്‍ അഭിനയിച്ചു. പുഷ്പ 2-ല്‍ ഫഹദ് ഫാസില്‍ തകര്‍ത്തടുക്കിയിട്ടുണ്ട്. രാജ്യം മുഴുവനുള്ള മലയാളികള്‍ക്ക് അഭിമാനിക്കാനുള്ള പ്രകടനമാണ് അദ്ദേഹം പുഷ്പ 2-ല്‍ കാഴ്ചവെച്ചിരിക്കുന്നത്. അത് ഞാന്‍ ഉറപ്പുതരാം, അല്ലു അർജുൻ പറഞ്ഞു.

പുഷ്പ 2'ലെ ഒരു പാട്ട് തുടങ്ങുന്നത് മലയാളം വരികളിൽ ആയിരിക്കും. ആ പാട്ടിന്‍റെ ഹൂക്ക് ലൈൻ ചിത്രം റിലീസ് ആവുന്ന ആറ് ഭാഷകളിലും മലയാളത്തിൽ തന്നെയായിരിക്കും. കേരളത്തിലെ എന്‍റെ ആരാധകരോടുള്ള നന്ദി അറിയിക്കാനാണ് ഞാൻ അങ്ങനെ ചെയ്തത്. ഇതിലും വലിയ രീതിയിൽ എനിക്ക് നിങ്ങളോടുള്ള സ്നേഹം അറിയിക്കാൻ ആവില്ലെന്നും അല്ലു അർജുൻ വ്യക്തമാക്കി.