പുതുവത്സരാഘോഷങ്ങളുടെ ഭാഗമായി രാസലഹരി ഒഴുകാനുള്ള സാധ്യത; കൊച്ചിയിൽ കർശന പരിശോധന
നഗരത്തിൽ പുതുവത്സരാഘോഷങ്ങളുടെ ഭാഗമായി രാസലഹരി ഒഴുകാനുള്ള സാധ്യതകൾ തടയാൻ പൊലീസ്. കഴിഞ്ഞ മൂന്നു ദിവസമായി കൊച്ചിയിലും പരിസര പ്രദേശങ്ങളിലുമായി നടന്ന കർശന പരിശോധനകൾക്കു പുറമേ നഗരാതിർത്തിയിൽ സൂക്ഷ്മനിരീക്ഷണം തുടരാനുമാണ് പൊലീസ് തീരുമാനം. രാസലഹരി കൂടി ഉൾപ്പെട്ടിട്ടുള്ള ഡിജെ പാർട്ടികളും മറ്റും നഗരത്തിലും പ്രാന്തമേഖലകളിലും നടക്കാന്‍ സാധ്യതയുള്ളതിനാൽ ഇതും പൊലീസിന്റെ നിരീക്ഷണത്തിലാണ്. രാജ്യത്തിന്റെ മറ്റു ഭാഗങ്ങൾക്കു പുറമേ രാജ്യാന്തര ലഹരി കടത്തിന്റെയും പ്രധാന കേന്ദ്രങ്ങളിലൊന്നായി കൊച്ചി മാറിയിരിക്കുന്ന സാഹചര്യത്തിൽ വിമാനത്താവളത്തിലും പരിശോധനകൾ കർശനമാണ്.
ബാങ്കോക്കിൽ നിന്ന് ട്രോളി ബാഗിൽ മിഠായിപ്പൊതികളായി കൊണ്ടുവന്ന മൂന്നര കോടിയുടെ ഹൈബ്രിഡ് കഞ്ചാവ് കൊച്ചി നെടുമ്പാശേരി വിമാനത്താവളത്തിൽ പിടികൂടിയത് ഈ മാസമാദ്യമാണ്. പ്രതി മലപ്പുറം സ്വദേശി ഉസ്മാൻ പിടിയിലായി. 2022ൽ സിംബാബ്‍വെയിൽനിന്നു ദോഹ വഴി കൊച്ചിയിലെത്തി ഇവിടെനിന്നു ഡൽഹിയിലേക്കുള്ള വിമാനം കയറുന്നതിനിടെ ലഹരി മരുന്നുമായി പിടിയിലായ പാലക്കാട് സ്വദേശി മുരളീധരൻ നായരെ കോടതി ശിക്ഷിച്ചത് അടുത്തിടെയാണ്. രാജ്യാന്തര വിപണിയിൽ 60 കോടി രൂപ വിലവരുന്ന മെഥാക്വിനോളാണ് ഇയാളിൽനിന്നു പിടികൂടിയത്. ആഫ്രിക്കൻ രാജ്യങ്ങളിൽ നിന്ന് വലിയ തോതിൽ കൊക്കെയ്ൻ അടക്കമുള്ള ലഹരിവസ്തുക്കൾ കടത്തുന്നതും കൊച്ചിയിൽ പിടിക്കപ്പെട്ടിട്ടുണ്ട്.
അതോടൊപ്പം, ഈ വർഷം മാത്രം സമുദ്രപാതയിലൂടെ കടത്തിയ 3600 കിലോഗ്രാമിലേറെ ലഹരിവസ്തുക്കൾ നാവികസേനയും കോസ്റ്റ്ഗാർഡും നർക്കോട്ടിക് കൺട്രോൾ ബ്യൂറോയും ചേർന്ന് പിടികൂടിയിട്ടുണ്ട്. ഇതിന്റെ നല്ലൊരു പങ്ക് കൊച്ചി തീരാതിർത്തി മേഖലകളിലാണ്. അഫ്ഗാനിസ്ഥാന്‍ അടക്കമുള്ള രാജ്യങ്ങളിൽ നിന്നെത്തുന്ന ലഹരി വസ്തുക്കൾ അയൽരാജ്യങ്ങളിലൂടെ കടന്ന് കടൽമാർഗം കൊച്ചിയിലെത്തി വീണ്ടും കടലു കടക്കുകയാണ് ചെയ്യുക. കൊച്ചിയിലെത്തുന്ന ലഹരിവസ്തുക്കളിൽ നല്ലൊരു പങ്കും പോകുന്നത് സംസ്ഥാനത്തിന്റെയും രാജ്യത്തിന്റെയും മറ്റു ഭാഗങ്ങളിലേക്കാണ്. അതോടൊപ്പം വിദേശത്ത് നിന്ന് എത്തിക്കുന്നതും എത്തുന്നതും കൂടാതെ ബെംഗളുരു, ഗോവ, ഡൽഹി എന്നിവിടങ്ങളിൽ നിന്നും രാസലഹരി കൊച്ചിയിലെത്തി മറ്റു മേഖകളിലേക്ക് പോകുന്നുണ്ട്.
മറ്റു സംസ്ഥാനങ്ങളിലേക്കും രാജ്യാന്തര വിപണികളിലേക്കുമുള്ള ലഹരി കടത്തിന്റെ ഇടത്താവളമായി നേരത്തെ മുതൽ കൊച്ചിയുണ്ടെങ്കിലും ഇപ്പോൾ ഇത് വർധിച്ചിട്ടുണ്ട് എന്നാണ് അധികൃതർ പറയുന്നത്. യൂറോപ്യൻ വിപണികളിലേക്കു വരെയുള്ള ലഹരി കടത്തിന്റെ നല്ലൊരു ശതമാനം കൊച്ചിയിലൂടെയാണ്. പരിശോധനകൾ കർശനമാണെങ്കിലും കുറിയർ വഴിയും മറ്റും ഇപ്പോഴും വിദേശങ്ങളിലേക്ക് ലഹരി കടത്തുന്ന സംഘങ്ങളുണ്ടെന്ന് ഈ മേഖലയുമായി ബന്ധപ്പെട്ടവർ പറയുന്നു. ഇത്തവണ ക്രിസ്മസും പുതുവത്സരവും പ്രമാണിച്ച് ലഹരിമരുന്ന് ഒഴുകാൻ സാധ്യതയുള്ളതിനാൽ വലിയ പരിശോധനകളാണ് കഴിഞ്ഞ 3 ദിവസമായി കൊച്ചി പൊലീസ് നടത്തിക്കൊണ്ടിരിക്കുന്നത്. ഇന്നലെ നടന്ന പരിശോധനയിൽ മാത്രം 47 പേർ അറസ്റ്റിലാവുകയും 41 കേസുകൾ റജിസ്റ്റർ ചെയ്യുകയും ചെയ്തു. പിടിച്ചെടുത്തവയിൽ എംഡിഎംഎ, എൽഎസ്ഡി സ്റ്റാംപുകൾ, കഞ്ചാവ് തുടങ്ങിയവയെല്ലാം പിടിച്ചെടുത്തവയിൽ ഉൾപ്പെടും.
ഒരേസമയം വിവിധയിടങ്ങൾ കേന്ദ്രീകരിച്ചായിരുന്നു പരിശോധന. രാവിലെ 6 മുതൽ തുടങ്ങിയ പരിശോധന രാത്രി വൈകിയും നീണ്ടു. 250ലധികം പൊലീസുകാർ ഉൾപ്പെട്ട സംഘം ഒരേ സമയം 60ലധികം പ്രദേശങ്ങളിൽ പരിശോധന നടത്തി. ഹോട്ടലുകൾ, ഹോംസ്റ്റേകൾ, മസാജ് പാർലറുകൾ, ഒറ്റപ്പെട്ട ഇടങ്ങൾ, മുൻപ് രാസലഹരി കേസിലും മറ്റും ഉൾപ്പെട്ടിട്ടുള്ളവരുടെ വീടുകൾ, സംശയമുള്ള വാഹനങ്ങൾ തുടങ്ങിയവ കേന്ദ്രീകരിച്ചായിരുന്നു പരിശോധനകൾ. അതോടൊപ്പം, ലഹരി വിൽപന കേസിലെ സ്ഥിരം പ്രതികള്‍, ജയിലിൽനിന്ന് ഇറങ്ങിയവർ തുടങ്ങിയവർക്ക് മേൽ മുഴുവൻ സമയ നിരീക്ഷണവുമുണ്ട്. കൊച്ചിയിലെ ലഹരി പാർട്ടികൾ കൂടുതലും നഗരാതിർത്തികളിലേക്കും അതുപോലെ ഹിൽ സ്റ്റേഷനുകളിലേക്കും മാറിയിട്ടുണ്ടെന്ന വിവരവും അന്വേഷണ ഏജൻസികൾ പങ്കുവയ്ക്കുന്നു.