സ്വര്‍ണവില സര്‍വകാല റെക്കോഡിൽ. കേരളത്തിൽ സ്വർണവില റെക്കോർഡ് ഉയർച്ച തുടരുകയാണ്. കഴിഞ്ഞ ദിവസം ആദ്യമായി 62,000 രൂപ കടന്ന സ്വർണവില ഇന്ന് 63,000 രൂപയും കടന്നു. 760 രൂപ വർധിച്ചതോടെ ഒരു പവൻ സ്വർണത്തിന്റെ വില 63,240 രൂപയായി. ഒരു ഗ്രാം സ്വർണത്തിന്റെ വില 7,905 രൂപയായി. ഗ്രാമിന് 95 രൂപ വർധിച്ചു. വെള്ളിയുടെ വിലയിൽ രണ്ട് രൂപ വർധിച്ച് ഗ്രാമിന് 106 രൂപയായി.
കഴിഞ്ഞ മാസം 22-ന് ആദ്യമായി പവൻ വില 60,000 രൂപ കടന്നിരുന്നു. മാസത്തിന്റെ തുടക്കം മുതൽ സ്വർണവിലയിൽ തുടർച്ചയായ ഉയർച്ചയാണ് നിലനിൽക്കുന്നത്. ഒരു മാസത്തിനിടെ ഏകദേശം 6,000 രൂപയിലധികം വിലയിൽ വർധനവ് രേഖപ്പെടുത്തിയിട്ടുണ്ട്.
പ്രസിഡന്‍റ് ട്രംപിന്‍റെ വ്യാപാരയുദ്ധവും തുടർന്നുള്ള സംഭവവികാസങ്ങളുമാണ് സ്വർണവില കുതിപ്പിനുള്ള കാരണം. ട്രംപിന്‍റെ വ്യാപാര നയങ്ങൾ ഭൗമ രാഷ്ട്ര സംഘർഷങ്ങൾക്കിടയാക്കി. കാനഡയിൽ നിന്നും മെക്സിക്കോയിൽ നിന്നും അമേരിക്കയിലേക്ക് വരുന്ന സാധനങ്ങൾക്ക് 25 % അധിക നികുതി പ്രാബല്യത്തിൽ വന്നെങ്കിലും മെക്സിക്കോയുടെ ഇറക്കുമതി തീരുവ ഒരു മാസത്തേക്ക് മരവിപ്പിച്ചിട്ടുണ്ട്. ചൈനയുടെ പ്രഖ്യാപനങ്ങൾക്ക് ലോകം കാതോർക്കുന്നുണ്ട്. ഡോളർ ഇൻഡക്സ് 109.80 വരെ ഉയർന്നു. ഡോളർ കരുത്തായതോടെ എല്ലാ കറൻസികളും ഡോളറിനെതിരെ ദുർബലമായിട്ടുണ്ട്.
ഇന്ത്യൻ രൂപയുടെ വിനിമയ നിരക്ക് കൂടുതൽ ദുർബലമായി 87.02 ലേക്ക് എത്തിയത് ആഭ്യന്തരമാർക്കറ്റിൽ സ്വർണവിലയെ സ്വാധീനിച്ചു. ഡോളർ കൂടുതൽ കരുത്തായി ഇൻഡക്സ് 110 കടന്നു മുന്നോട്ട് നീങ്ങിയാൽ രൂപ കൂടുതൽ ദുർബലമായി 89ലേക്ക് എത്തും എന്നുള്ള സൂചനകൾ വരുന്നുണ്ട്. ഡോളർ കരുത്താർജിക്കുമ്പോൾ അന്താരാഷ്ട്ര സ്വർണ വിലയിൽ തിരുത്തൽ വരേണ്ടതാണെങ്കിലും ട്രേഡ് വാർ ടെൻഷൻ അടക്കം ട്രoപിൻ്റെ മറ്റ് നടപടികളിലുള്ള ആശങ്ക സ്വർണ വിലയെ 2830 ഡോളറിലേക്ക് ഉയർത്തി.
വരും ദിവസങ്ങളിലും സ്വർണവിലയിൽ ചാഞ്ചാട്ടം പ്രതീക്ഷിക്കാം. 2836 ഡോളറിനു മുകളിൽ 2860-70 ഡോളർ വരെ പ്രതീഷിക്കാം. 2800 ഡോളറിൽ താഴെ 2770 -2760 വരെ തിരുത്തൽ വരാം സാങ്കേതികമായി. വൻ വിലവർധനവ് ഏഷ്യൻ മാർക്കറ്റിൽ സ്വര്‍ണത്തിന്‍റെ ഡിമാൻഡ് കുറച്ചു.