മുടി പറ്റെ വെട്ടി, കട്ടത്താടിയില്‍ ഞെട്ടിച്ച് ചോക്ലേറ്റ് നായകന്‍ ചാക്കോച്ചന്‍
മലയാളത്തിന്റെ ചോക്ലേറ്റ് ഹീറോ ആണ് കുഞ്ചാക്കോ ബോബന്‍ എന്ന ചാക്കോച്ചന്‍. അനിയത്തിപ്രാവ് എന്ന ചിത്രത്തിലൂടെ വെള്ളിത്തിരയില്‍ അരങ്ങേറ്റം കുറിച്ച താരം പിന്നീട് നിരവധി ഹിറ്റ് ചിത്രങ്ങളിലൂടെ ജനഹൃദയങ്ങള്‍ കീഴടക്കുകയായിരുന്നു.
ചോക്ലേറ്റ് നായകന്‍ എന്ന താരപരിവേഷം അദ്ദേഹത്തിലെ നടന് ഒരു ഭാരമായും മാറി. അത് തിരിച്ചറിഞ്ഞ് കഥാപാത്രങ്ങളുടെ തെരഞ്ഞെടുപ്പില്‍ ഏറെ ശ്രദ്ധിച്ചാണ് കുഞ്ചാക്കോ ബോബന്റെ ഇപ്പോഴത്തെ യാത്ര. സ്ഥിരം പാറ്റേണ്‍ വിട്ടുള്ള അദ്ദേഹത്തിന്റെ പല പരീക്ഷണങ്ങളും പ്രേക്ഷകര്‍ ഇരുകൈയും നീട്ടി സ്വീകരിക്കുകയും ചെയ്തു. ഇപ്പോഴിതാ, ആ നിരയിലേക്ക് ഒരു പുതിയ ചിത്രവും എത്തുകയാണ്. ചാവേര്‍ എന്ന് പേരിട്ടിരിക്കുന്ന ചിത്രത്തില്‍ വമ്പന്‍ മേക്ക്ഓവറിലാണ് താരം എത്തുന്നത്.
സൂപ്പര്‍ ഹിറ്റ് ആയ അജഗജാന്തരത്തിനുശേഷം ടിനു പാപ്പച്ചന്റെ സംവിധാനത്തിലെത്തുന്ന ചിത്രമാണ് ചാവേര്‍. കുഞ്ചാക്കോ ബോബനൊപ്പം ആന്റണി വര്‍ഗീസും അര്‍ജുന്‍ അശോകനും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു. കഴിഞ്ഞ ദിവസം കേരളമൊട്ടാകെ പത്രങ്ങളോടൊപ്പം ലുക്ക് ഔട്ട് നോട്ടീസിന്റെ മാതൃകയില്‍ ചിത്രത്തിന്റെ പരസ്യ നോട്ടീസ് എത്തിയിരുന്നു.
ചാക്കോച്ചന്‍ അവതരിപ്പിക്കുന്ന അശോകനെ തേടിക്കൊണ്ടുള്ള അറിയിപ്പ് ആയിരുന്നു അത്. ഇപ്പോഴിതാ അശോകന്‍ പ്രേക്ഷകരുടെ കണ്‍മുന്നിലേക്ക് മറനീക്കി എത്തിയിരിക്കുകയാണ്. ചാവേറിലെ ചാക്കോച്ചന്റെ ഞെട്ടിക്കുന്ന ലുക്ക് സോഷ്യല്‍ മീഡിയയില്‍ പ്രചരിക്കുകയാണ്. മുടി പറ്റെ വെട്ടി, കട്ടത്താടിയില്‍, തീപാറുന്ന നോട്ടവുമായാണ് ചാക്കോച്ചന്‍ അശോകനായി മാറിയിരിക്കുന്നത്.
മലയാളത്തിലെ ഒരു വ്യത്യസ്ത ത്രില്ലര്‍ സിനിമയാകാനുള്ളതെല്ലാം ചിത്രത്തിലുണ്ടെന്ന സൂചന തരുന്നതായിരുന്നു സിനിമയുടേതായി മുമ്പ് പുറത്തിറങ്ങിയിരുന്ന ടൈറ്റില്‍ പോസ്റ്ററും ടീസറും. കത്തിയെരിയുന്ന കാട്ടില്‍നിന്നും ജീവനും കൊണ്ടോടുന്നൊരാള്‍ക്ക് നേരേ പാഞ്ഞുപോകുന്നൊരു ജീപ്പ്, അതിന് പിന്നിലായി ഓടുകയാണ് ചാക്കോച്ചന്റെ അശോകന്‍ എന്ന കഥാപാത്രവും പിന്നാലെ ഒരു തെയ്യക്കോലവും. മുമ്പേ ഓടിയയാളെ അശോകന്‍ അക്രമിക്കുന്നതായിരുന്നു ടീസറിലുണ്ടായിരുന്നത്.