ഭാര്യയുമായി വഴക്കിടുന്നതും ഇണങ്ങുന്നതും പതിവാണ്. സ്നേഹമുള്ളയിടത്തേ വഴക്കുണ്ടാകൂ എന്നെല്ലാം പറഞ്ഞു കാര്യങ്ങൾ കോംപ്രമൈസ് ആക്കും. എന്നാൽ തമിഴ്നാട്ടിലെ കൊളത്തൂരിൽ ഭാര്യയുമായി വഴക്കിട്ട യുവാവ് കാണിച്ചുകൂട്ടിയ പരാക്രമങ്ങൾ വൻ സംഭവമായി മാറി.
വഴക്കിനെത്തുടർന്ന് യൂസ്ഡ് കാർ ഷോറൂമിൽ വിൽപ്പനയ്ക്കാ‍യി പാർക്ക് ചെയ്തിരുന്ന 20 കാറുകളാണ് യുവാവ് അടിച്ചുതകര്‍ത്തത്. ഷോറൂം ഉടമ നൽകിയ പരാതിയിൽ മുപ്പത്തഞ്ചുകാരനായ ഭൂബാലനെ പോലീസ് അറസ്റ്റ് ചെയ്തു. കുടുംബപ്രശ്‌നമാണ് യുവാവിന്‍റെ പരാക്രമത്തിനു കാരണമെന്ന് പോലീസ് പറഞ്ഞു.
കൊളത്തൂരിലാണു സംഭവം. തിങ്കളാഴ്ച രാവിലെ ഷോറൂമില്‍ എത്തിയപ്പോള്‍ കാറുകള്‍ അടിച്ചുതകര്‍ത്തനിലയിലായിരുന്നുവെന്ന് ഷോറൂം ഉടമ പറഞ്ഞു. സിസിടിവി ദൃശ്യങ്ങളുടെ സഹായത്തോടെ നടത്തിയ അന്വേഷണത്തിനൊടുവിലാണ് പ്രതി കുടുങ്ങിയത്. ലഹരിക്കടിമയായ ഭൂബാലൻ രണ്ടു ദിവസം മുന്പാണ് ലഹരി വിമുക്തകേന്ദ്രത്തില്‍ നിന്നു ചികിത്സകഴിഞ്ഞു പുറത്തിറങ്ങിയത്.
ഭാര്യയുമായി വഴക്കിട്ട ഭൂബാലൻ നേരെ കാർ ഷോറൂമിൽ എത്തുകയും വാഹനങ്ങള്‍ അടിച്ചുതകര്‍ക്കുകയായിരുന്നു. ഭാര്യയോടുള്ള സംശയമാണ് പരാക്രമത്തിലെത്തിച്ചതെന്നും പോലീസ് പറയുന്നു.
