ഝാര്‍ഖണ്ഡില്‍നിന്നും പാലായിലേക്ക് കടത്തിക്കൊണ്ടുവന്ന് വില്‍പനയ്ക്ക് സൂക്ഷിച്ച 2.5 കിലോ കഞ്ചാവുമായി ഝാര്‍ഖണ്ഡ് സ്വദേശി പിടിയിൽ. ദന്‍ബാദ് ജില്ലയിലെ കപുരിയ സ്വദേശി സച്ചിന്‍ കുമാര്‍ സിങ്ങിനെ (28)യാണ് പോലീസ് അറസ്റ്റ് ചെയ്തത്. പാലാ എക്‌സൈസ് റേഞ്ച് ഇന്‍സ്‌പെക്ടര്‍ ബി. ദിനേശിന്റെ നേതൃത്വത്തില്‍ നടത്തിയ റെയ്ഡിലാണ് ഇയാള്‍ പിടിയിലായത്.
പാലാ ടൗണിലെ പച്ചക്കറി കടയില്‍ ജോലി ചെയ്തുവന്നിരുന്ന ഇയാളെ ഏതാനും ആഴ്ചകളായി പാലാ റേഞ്ച് എക്‌സൈസ് സംഘം നിരീക്ഷിക്കുന്നുണ്ടായിരുന്നു. അതേസമയം മലയാളിയായ യുവാവിനെ കുത്തി പരിക്കേല്‍പ്പിച്ച കേസിലും ഇയാള്‍ പ്രതിയാണ്. മിനി സിവില്‍ സ്റ്റേഷന് എതിര്‍വശത്തുഉള്ള ലോഡ്ജിലാണ് ഇയാള്‍ താമസിച്ചിരുന്നത്.
കേസില്‍ കൂടുതല്‍ പേര്‍ ഉള്‍പ്പെട്ടിട്ടുണ്ടോ എന്ന് സംശയിക്കുന്നതായാണ് എക്‌സൈസ് ഇന്‍സ്‌പെക്ടര്‍ പറയുന്നത്. വിശദമായ അന്വേഷണം ആരംഭിച്ചിട്ടുണ്ട്. എക്‌സൈസ് റേഞ്ച് ഇന്‍സ്‌പെക്ടര്‍ ബി. ദിനേശ്, ഇന്‍സ്‌പെക്ടര്‍ ഫിലിപ്പ് തോമസ്, അസിസ്റ്റന്റ് എക്‌സൈസ് ഇന്‍സ്‌പെക്ടര്‍ കെ.വി. അനീഷ് കുമാര്‍, സിവില്‍ എക്‌സൈസ് ഓഫീസര്‍മാര്‍ എന്നിവടങ്ങിയ സംഘമാണ് പ്രതിയെ പിടികൂടിയത്.
