വേനൽക്കാല ഓഫറുമായി ഇത്തിഹാദ്; അബുദാബിയിൽ നിന്ന് ഇന്ത്യയിലേക്ക് 995 ദിർഹം മാത്രം

യുഎഇ നിവാസികൾക്കായി വേനൽക്കാല ഓഫറുമായി ഇത്തിഹാദ് എയർവേഴ്‌സ്. ഇന്ത്യ ഉൾപ്പെടെയുള്ള വിവിധ ലക്ഷ്യസ്ഥാനങ്ങളിലേക്കാണ് ചെറിയ നിരക്കിലുള്ള ടിക്കറ്റ് വിൽപ്പന പ്രഖ്യാപിച്ചിരിക്കുന്നത്. അബുദാബിയിൽ നിന്ന് കൊൽക്കത്തയിലേക്കുള്ള ഇക്കണോമി ക്ലാസ് റിട്ടേൺ വിമാന നിരക്ക് 995 ദിർഹം മുതലാണ് ആരംഭിക്കുന്നത്.

യുഎഇയിലെ വിവിധ എമിറേറ്റുകളിൽ താമസിക്കുകയും ജോലി ചെയ്യുകയും ചെയ്യുന്ന ദശലക്ഷക്കണക്കിന് ഇന്ത്യൻ പൗരന്മാർക്ക് ആശ്വാസമാവുന്ന ഓഫറുമായാണ് ഇത്തിഹാദ് എയർവെയ്സ് രംഗത്തുവന്നിരിക്കുന്നത്. ഏറ്റവും തിരക്കേറിയ എയർ റൂട്ടുകളിലൊന്നാണ് യുഎഇ-ഇന്ത്യ ഇടനാഴി. അതുകൊണ്ടു തന്നെ ആയിരക്കണക്കിന് ആളുകൾക്ക് ഈ ഓഫർ പ്രയോജനപ്പെടും. മാർച്ച് 26 മുതൽ യുഎഇയുടെ ദേശീയ വിമാനക്കമ്പനിയും അബൂദാബിക്കും കൊൽക്കത്തയ്ക്കും ഇടയിൽ പ്രതിദിന ഫ്ലൈറ്റുകൾ പുനരാരംഭിച്ചിരുന്നു. നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തിലേക്ക് ആഴ്ചയിൽ ഏഴ് നോൺ-സ്റ്റോപ്പ് സർവീസുകളാണ് എയർവെയ്സ് നടത്തുന്നത്.

ഞങ്ങളുടെ സമീപകാല ആഘോഷ ഫ്ലാഷ് സെയിലിനെത്തുടർന്ന്, വേനൽക്കാലത്തിന് മുമ്പ് പറക്കാൻ ആഗ്രഹിക്കുന്ന അതിഥികൾക്ക് കൂടുതൽ അവിശ്വസനീയമായ നിരക്കുകളും പ്രത്യേക ഡീലുകളും ലഭ്യമാക്കുന്നതിൽ ഞങ്ങൾ സന്തുഷ്ടരാണെന്ന് ഇത്തിഹാദ് എയർവേസ് ചീഫ് റവന്യൂ ഓഫീസർ അരിക് ഡെ പറഞ്ഞു. അവസാന നിമിഷം ഒരു യാത്ര ബുക്ക് ചെയ്യാൻ പലരും താൽപ്പര്യപ്പെടുന്നുണ്ടെന്ന് ഞങ്ങൾക്കറിയാം. അതിനാൽ, വേനൽക്കാലത്തിന് മുമ്പുള്ള അവധിക്കാലം ആഘോഷിക്കാൻ ഞങ്ങളുടെ ഉപഭോക്താക്കളെ സഹായിക്കുന്നതിന് ഞങ്ങൾ യൂറോപ്പ്, മിഡിൽ ഈസ്റ്റ്, ഏഷ്യ എന്നിവിടങ്ങളിലെ നിരവധി ലക്ഷ്യസ്ഥാനങ്ങളിലേക്ക് നിരക്ക് ഇളവുകൾ പ്രഖ്യാപിച്ചിട്ടുണ്ടെന്നും അദ്ദേഹം വ്യക്തമാക്കി.