സിനിമാ -സീരിയൽ താരം അപർണയെ മരിച്ച നിലയിൽ; അവസാനം പങ്കുവച്ചത് മകളുടെ ചിത്രം

സിനിമാ -സീരിയൽ താരം അപർണയെ മരിച്ച നിലയിൽ കണ്ടെത്തി. മൃതദേഹം തിരുവനന്തപുരം പിആർഎസ് ആശുപത്രിയിലേക്ക് മാറ്റി. ഇന്നലെ വൈകിട്ട് ഏഴുമണിയോടെയാണ് കരമനയിലെ വീട്ടിൽ അപർണയെ മരിച്ച നിലയിൽ കണ്ടത്തിയത്. ഉടൻ അടുത്തുള്ള സ്വകാര്യ ആശുപത്രിയിലെത്തിച്ചെങ്കിലും മരിച്ചിരുന്നു. മൃതദേഹം മോർച്ചറിയിൽ സൂക്ഷിച്ചിരിക്കുകയാണ്. മരണകാരണം വ്യക്തമല്ല. അസ്വാഭാവിക മരണത്തിന് കരമന പൊലീസ് കേസെടുത്തിട്ടുണ്ട്.

സിനിമ,സീരിയൽ നടി അപർണ നായരുടെ അപ്രതീക്ഷിത മരണം തീർത്ത ഞെട്ടലിലാണ് ഉറ്റവരും പ്രേക്ഷകരും. മരണം സംഭവിക്കുന്നതിന് തൊട്ടുമുൻപ് പോലും സോഷ്യൽമീഡിയയിൽ സജീവമായിരുന്നു അപർണ. 'എന്റെ ഉണ്ണി കളി പെണ്ണ്'' എന്ന അടിക്കുറിപ്പോടെ മകളുടെ ചിത്രമായിരുന്നു അപർണ അവസാനമായി പങ്കുവച്ചത്. അതും മരിക്കുന്നതിനു മണിക്കൂറുകൾക്കു മുമ്പാണ് റീൽ പങ്കുവച്ചത്. ഭർത്താവിനും മക്കൾക്കുമൊപ്പമുള്ള ചിത്രങ്ങളാണ് സോഷ്യൽ മീഡിയയിൽ അപർണ ഏറെയും പങ്കുവച്ചിട്ടുളളത്.

2009ലെ മേഘതീർത്ഥം എന്ന ചിത്രത്തിലൂടെയാണ് സിനിമാ പ്രവേശം. അച്ചായൻസ്, കോടതി സമക്ഷം ബാലൻ വക്കീൽ, കൽക്കി തുടങ്ങിയ സിനിമകളിലും അഭിനയിച്ചു. കടൽ പറഞ്ഞ കഥ ആണ് ഏറ്റവും ഒടുവിലത്തെ ചിത്രം.