പാലക്കാട് ധോണി മൂലപ്പാടത്ത് പുലി ഇറങ്ങിയതായി നാട്ടുകാർ. മൂലപ്പാടത്ത് ഷംസുദ്ധീന്റെ വീട്ടിലെ പശുവിനെ പുലി ആക്രമിച്ച് കൊലപ്പെടുത്തിയതായാണ് റിപ്പോർട്ട്. വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. പുലിയുടെ സാന്നിധ്യമുണ്ടെന്നാണ് പ്രഥമിക സ്ഥിരീകരണം.
വനംവകുപ്പ് ഉദ്യോഗസ്ഥരെ ആദ്യം വിവരമറിയിച്ചു എങ്കിലും വേണ്ട നടപടികൾ സ്വീകരിച്ചില്ലെന്നാണ് നാട്ടുകാർ ആരോപിക്കുന്നത്. മാസങ്ങൾക്ക് മുമ്പ് പ്രദേശത്ത് പുലിയുടെ സാന്നിധ്യമുണ്ടായിരുന്നു. എന്നിട്ടും വനംവകുപ്പ് വേണ്ട നടപടിയെടുത്തില്ലെന്ന ആക്ഷേപവും ഉയരുന്നുണ്ട്. കൂട് സ്ഥാപിക്കുന്നതുൾപ്പെടെയുള്ള നടപടികളാണ് നാട്ടുകാർ പ്രതീക്ഷിക്കുന്നത്. നേരത്തെയും ധോണിയിൽ പുലിയും ആനയും ഇറങ്ങിയിരുന്നു. വന്യമൃഗങ്ങൾ ഏറെ ഭീഷണിയുയർത്തുന്ന നിലവിലെ സാഹചര്യത്തിൽ നാട്ടുകാർ ആശങ്കയിലാണ്.