'രക്തബന്ധമുള്ള ഒരു വ്യക്തി മലയാളത്തിൽ അവസരങ്ങൾ ഇല്ലാതാക്കുന്നു, അയാളുമായി കോൺടാക്ടില്ല': അർത്ഥന ബിനു

ചുരുങ്ങിയ സിനിമകളിലൂടെ ശ്രദ്ധ നേടിയ യുവനടിയാണ് അർത്ഥന ബിനു. മലയാളത്തിന് പുറമെ തെലുങ്കിലും തമിഴിലുമെല്ലാം അർത്ഥന അഭിനയിച്ചിട്ടുണ്ട്. ഒരിടയ്ക്ക് അഭിനയത്തിൽ നിന്നും ഇടവേളയെടുത്ത അർത്ഥന ഇപ്പോൾ തിരികെ വന്നിരിക്കുകയാണ്. അർത്ഥനയുടെ കുടുംബപ്രശ്നങ്ങളും ഈയ്യടുത്ത് വാർത്തയായിരുന്നു. ഇപ്പോഴിതാ തന്റെ സിനിമാ ജീവിതത്തെക്കുറിച്ച് മഹിളാരത്നത്തിന് നൽകിയ അഭിമുഖത്തിൽ അർത്ഥന മനസ് തുറക്കുകയാണ്.

'സത്യം പറഞ്ഞാൽ മലയാളം സിനിമയിൽ നിന്നും എനിക്ക് അധികം അവസരങ്ങൾ കിട്ടാറില്ല. വല്ലപ്പോഴുമാണ് ഇവിടെ നിന്നും ഒരു അവസരം വരുന്നതു പോലും. പക്ഷെ കിട്ടുന്ന അവസരങ്ങളിൽ നിന്നും മികച്ചത് എന്നു തോന്നുന്ന സിനിമകളും കഥാപാത്രങ്ങളും തെരഞ്ഞെടുക്കുവാൻ ശ്രദ്ധിക്കാറുണ്ടെന്നും അർത്ഥന പറയുന്നു. പിന്നെ ഇടയ്ക്ക് സിനിമയിൽ നിന്നും ബ്രേക്ക് എടുത്തിരുന്നു. കാനഡയിൽ പോയി സോഷ്യൽ സർവ്വീസിന്റെ ഒരു കോഴ്സ് പഠിക്കാൻ വേണ്ടിയായിരുന്നുവെന്നും അർത്ഥന പറയുന്നുണ്ട്.

ആ സമയത്ത് താൻ കാനഡയിൽ പാർട്ട് ടൈം ജോലിയും ചെയ്തിരുന്നു. 2022 ഒക്ടോബറിൽ ആണ് തിരിച്ചെത്തിയത്. അത് കഴിഞ്ഞു ഇപ്പോൾ സിനിമയിൽ സജീവമാകണമെന്നാണ് ആഗ്രഹമെന്നും അർത്ഥന പറയുന്നു. സിനിമയിൽ നിന്നും തനിക്ക് വരുന്ന അവസരങ്ങൾ തടയുന്നതിനെക്കുറിച്ചും അർത്ഥന സംസാരിക്കുന്നുണ്ട്.

ഇൻഡസ്ട്രിയിൽ അങ്ങനെ സപ്പോർട്ട് എന്നു പറയാൻ എനിക്ക് ആരും തന്നെ ഇല്ല. പക്ഷെ രക്തബന്ധമുള്ള ഒരു വ്യക്തി മലയാളത്തിൽ അവസരങ്ങൾ ഇല്ലാതാക്കുവാനും തടയുവാനും നിരന്തരം ശ്രമിക്കുന്നുണ്ടെന്നും അർത്ഥന പറയുന്നുണ്ട്. അതേസമയം താനും അദ്ദേഹവുമായി ഒരു കോൺടാക്ടും ഇല്ലെന്നും അർത്ഥന പറയുന്നുണ്ട്. ഈയ്യടുത്തിറങ്ങിയ ടൊവിനോ തോമസ് ചിത്രം അന്വേഷിപ്പിൻ കണ്ടെത്തും എന്ന സിനിമയിൽ അർത്ഥന അഭിനയിച്ചിരുന്നു.

അന്വേഷിപ്പിൻ കണ്ടെത്തും എന്ന ചിത്രത്തിന്റെ ഒരു ചെറിയ ഭാഗമാകാൻ കഴിഞ്ഞതിൽ സന്തോഷമുണ്ട്. ശ്രീദേവി എന്നാണ് തന്റെ കഥാപാത്രത്തിന്റെ പേരെന്നും അർത്ഥന പറയുന്നു. തന്റെ പുതിയ സിനിമകളെക്കുറിച്ചും അർത്ഥന സംസാരിക്കുന്നുണ്ട്. തമിഴിൽ നകുലിന്റെ നായികയായി അഭിനയിച്ച വാസ്‌കോഡഗാമ ആണ് റിലീസിന് തയ്യാറായി നിൽക്കുന്ന സിനിമയെന്ന് അർത്ഥന പറയുന്നു.

ഇതിന് പുറമെ തെലുങ്ക് ചിത്രത്തിന്റെ ചിത്രീകരണം നടന്നു കൊണ്ടിരിക്കുകയാണ്. അതിൽ താൻ നായികയായാണ് അഭിനയിക്കുന്നതെന്നും സിനിമയ്ക്ക് പേരിട്ടിട്ടില്ലെന്നും അർത്ഥന പറയുന്നു. യാത്രകൾ ഇഷ്ടപ്പെടുന്ന ആളാണ് അർത്ഥന. താൻ ഏറ്റവും കൂടുതൽ യാത്രകൾ പോയിട്ടുള്ളത് കാനഡയിലായിരുന്ന ഒരു വർഷമാണെന്നാണ് അർത്ഥന പറയുന്നത്. അവിടെ ബോൺ എക്കോയും ടോബർ മോറിയും തനിക്ക് ഇഷ്ടപ്പെട്ട സ്ഥലങ്ങളാണെന്നും അർത്ഥന പറയുന്നു.

അതേസമയം കാനഡ ഇനിയും വിസിറ്റ് ചെയ്യണമെന്ന് ആഗ്രഹമുണ്ടെന്നും ഇനിയും കൂടുതൽ യാത്രകൾ ചെയ്യണമെന്നുണ്ടെന്നും അർത്ഥന പറയുന്നു. ഇപ്പോൾ തന്റെ ഭാവി സിനിമയാണെന്നാണ് അർത്ഥനയുടെ തീരുമാനം. നല്ല സിനിമകളുടെ ഭാഗമാകണമെന്നും താരം ആഗ്രഹിക്കുന്നുണ്ട്. നടൻ വിജയകുമാറിന്റെ മകളാണ് അർത്ഥന. എന്നാൽ വിജയകുമാർ അർത്ഥനയേയും അമ്മയേയും അനിയത്തിയേയും ഉപേക്ഷിച്ച് പോവുകയായിരുന്നു.