എമിറേറ്റിലെ ഗതാഗത രംഗത്ത് വിപ്ലവകരമായ മാറ്റങ്ങൾക്ക് കാരണമാകുന്ന മെട്രോ ബ്ലൂലൈൻ പദ്ധതി ഈ വർഷം ആരംഭിക്കും. ദുബൈ റോഡ് ഗതാഗത അതോറിറ്റി(ആർ.ടി.എ) ഡയറക്ടർ ബോർഡ് ചെയർമാനും ഡയറക്ടർ ജനറലുമായ മതാർ അൽ താഇറാണ് ഇക്കാര്യം വെളിപ്പെടുത്തിയത്. യു.എ.ഇ വൈസ് പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം നേരത്തേ പദ്ധതിക്ക് അനുമതി നൽകിയിരുന്നു. നിലവിലുള്ള റെഡ്, ഗ്രീൻ ലൈനുകളുമായി ബന്ധിപ്പിച്ച് നിർമിക്കുന്ന പാത 30 കി.മീറ്റർ നീളമുള്ളതാണ്. 15.5 കി.മീറ്റർ പാത ഭൂമിക്കടിയിലും 14.5 കി.മീറ്റർ പാത മുകളിലൂടെയുമാണ് കടന്നുപോവുക.
2029ൽ പ്രവർത്തനസജ്ജമാകുന്ന മെട്രോ ലൈൻ പൂർത്തിയാകുന്നതോടെ നഗരത്തിലെ ഗതാഗത മേഖലയിൽ വലിയ കുതിച്ചുചാട്ടമാണ് പ്രതീക്ഷിക്കുന്നത്. പാതയുടെ നിർമാണത്തിന് 1800 കോടി ദിർഹം ചെലവാണ് പ്രതീക്ഷിക്കുന്നത്. ഭൂമിക്കടിയിൽ 70 മീറ്റർ ആഴത്തിലായിരിക്കും പാത നിർമിക്കുക. 2028ൽ പരിക്ഷണയോട്ടവും 2029ൽ ഔദ്യോഗികമായി ഓപറേഷൻ തുടങ്ങാനുമാണ് ആസൂത്രണം ചെയ്തിരിക്കുന്നത്. പദ്ധതി പൂർത്തിയാകുന്നതോടെ മൊത്തം മെട്രോ ശൃംഖല 78 സ്റ്റേഷനുകളും 168 ട്രെയിനുകളുമുള്ള 131 കിലോമീറ്റർ റെയിൽവേ ലൈനാകും. നഗരത്തിലെ ജനസംഖ്യ വർധനക്ക് അനുസൃതമായി ആസൂത്രണംചെയ്ത് ബ്ലൂലൈൻ പദ്ധതി 10 ലക്ഷം താമസക്കാർക്ക് യാത്രസൗകര്യം എളുപ്പമാക്കുന്നതാണെന്നും മതാർ അൽ താഇർ വെളിപ്പെടുത്തി.
എമിറേറ്റിൽ കഴിഞ്ഞവർഷം പൊതുഗതാഗതം ഉപയോഗിച്ച യാത്രക്കാരുടെ എണ്ണം 70.2 കോടിയാണെന്നും ഇവരിൽ 62 ശതമാനവും ഉപയോഗിച്ചത് ദുബൈ മെട്രോയും പൊതു ബസുകളുമാണെന്നും പ്രസ്താവനയിൽ അദ്ദേഹം വ്യക്തമാക്കി. ദുബൈ മെട്രോ, ട്രാം, ബസ് സർവിസ്, അബ്ര, ഫെറി, വാട്ടർ ടാക്സി, വാട്ടർ ബസ്, ടാക്സി, ബസ് ഓൺ ഡിമാൻഡ്, റെന്‍റൽ കാർ എന്നിവയടക്കം ഉപയോഗിച്ചവരുടെ ആകെ എണ്ണമാണ് 70കോടി പിന്നിട്ടത്. 2022ലെ ആകെ യാത്രക്കാരുമായി താരതമ്യം ചെയ്യുമ്പോൾ 13 ശതമാനം വർധനയാണ് ഇക്കാര്യത്തിൽ രേഖപ്പെടുത്തിയത്. ജനങ്ങൾ കൂടുതലായി പൊതുഗതാഗതം ഉപയോഗിക്കുന്നത് നല്ല സൂചനയാണെന്നും അധികൃതർ പ്രസ്താവനയിൽ കൂട്ടിച്ചേർത്തു. ആഗോള കാലാവസ്ഥ ഉച്ചകോടി(കോപ് 28) അടക്കം വിവിധ പരിപാടികൾക്ക് ദുബൈ സാക്ഷ്യംവഹിച്ച ഡിസംബറിലാണ് കഴിഞ്ഞ വർഷം ഏറ്റവും കൂടുതൽ പേർ പൊതുഗതാഗതം ഉപയോഗിച്ചത്.
