മോഷണങ്ങൾ തടയാൻ ഫലപ്രദമായ നടപടികളുമായ് ഷാർജാ പോലീസ്. നിർമ്മാണം നടക്കുന്ന കെട്ടിടങ്ങളിലും അടച്ചിട്ട വീടുകളിലും നടക്കുന്ന മോഷണങ്ങൾ തടയാൻ ഫലപ്രദമായ നടപടികളാണ് ഷാർജാ പോലീസ് ഏർപ്പെടുത്തിയിരിക്കുന്നത്. ദിവസങ്ങളോളം വീട് പൂട്ടി പുറത്തു പോകുന്ന താമസക്കാർ ആ വിവരം പോലീസിനെ അറിയിച്ചാൽ അത്തരം സ്ഥലങ്ങളിൽ പോലീസിന്റെ പ്രത്യേക നിരീക്ഷണം ഉണ്ടായിരിക്കുമെന്നും, നിർമ്മാണം നടന്ന് കൊണ്ടിരിക്കുന്ന സ്ഥലങ്ങളിൽ സോളാർ ക്യാമറകൾ ഘടിപ്പിച്ച് കൊണ്ട് പരിസരം സുരക്ഷിതമാക്കാൻ ബന്ധപ്പെട്ടവർക്ക് നിർദേശങ്ങൾ നൽകാറുണ്ടെന്നും ഷാർജാ പോലീസ് വ്യക്തമാക്കി.
ഇത്തരം കുറ്റക്യത്യങ്ങളിൽ ഏർപ്പെടുന്നവർ പലപ്പോഴും ദിവസങ്ങളോളം പരിസരം നിരീക്ഷിച്ചതിനു ശേഷമാണ് മോഷണം ആസൂത്രണം ചെയ്യുന്നത്. ഒറ്റപ്പെട്ട സ്ഥലങ്ങളിലും താമസ ഇടങ്ങളിലും സംശയകരമായ സാഹചര്യത്തിൽ ആളുകളെ കാണുകയാണെങ്കിൽ ആ വിവരം പോലീസിനെ അറിയിക്കണം. വിവരം ലഭിച്ചാൽ മിനിറ്റുകൾക്കകം പട്രോളിംങ് വാഹനങ്ങൾ സ്ഥലത്ത് എത്തിച്ചേരുകയും വിശദമായ പരിശോധനകൾ നടത്താനും സാധിക്കും. സർക്കാർ സ്ഥാപനങ്ങൾ മാത്രം സ്ഥിതി ചെയ്യുന്ന സ്ഥലങ്ങളിൽ പോലും ഇത്തരത്തിൽ മോഷണ ശ്രമങ്ങൾ നടക്കാറുണ്ടെന്നും എന്നാൽ പോലീസിന്റെ ക്യത്യമായ നിരീക്ഷണത്തിൽ കുറ്റക്രത്ത്യത്തിൽ ഏർപ്പെട്ടവരെ അറസ്റ്റ് ചെയ്യാൻ കഴിഞ്ഞതായും പോലീസ് വ്യക്തമാക്കി.
അടിയന്തിര പ്രതികരണ നിരക്ക് 4.58 എന്ന നിലയിലെത്തിക്കാൻ ഷാർജാ പോലീസിന്റെ ഓപ്പറേഷൻ വിഭാഗത്തിന് കഴിഞ്ഞിട്ടുണ്ട്. നിരക്ക് സൂചിപ്പിക്കുന്നത് കഴിഞ്ഞ വർഷങ്ങളെ അപേക്ഷിച്ച് ഏതാണ്ട് 15 ശതമാനത്തിന്റെ കുറവ് രേഖപ്പെടുത്തിയതായും പോലീസ് വ്യക്തമാക്കുന്നു. സമൂഹ മാധ്യമങ്ങളിൽ കൂടിയുള്ള തട്ടിപ്പാണ് അടുത്ത കാലത്തായ് കണ്ട് വരുന്ന ഏറ്റവും വലിയ വെല്ലുവിളി. എന്നാൽ സൈബർ മേഖലയിൽ വിദഗ്ധരായ ഉദ്യോഗസ്ഥർ മുഴുവൻ സമയവും നിരീക്ഷണം ശക്തമാക്കിയതായും പോലീസ് അറിയിച്ചു. മോബൈൽ ഫോണുകളിൽ ലഭിക്കുന്ന സന്ദേശങ്ങളെ പിന്തുടർന്ന് സാമ്പത്തീക ഇടപാടുകൾ നടത്തുകയും പിന്നീട് പണം നഷ്ടപ്പെട്ടതുമായ നിരവധി പരാതികൾ പോലീസിന് ലഭിക്കാറുണ്ടെന്നും സംശയം തോന്നുന്ന സന്ദേശങ്ങളിൽ ഇടപാടുകൾ നടത്തുന്നതിന് മുൻപ് ബന്ധപ്പെട്ടവരുമായ് നേരിട്ട് സംസാരിച്ച് ഇടപാട് നിയമപരമായാണ് നടത്തുന്നതെന്ന് ഉറപ്പു വരുത്തണമെന്നും പോലീസ് പൊതുജനങ്ങളോട് ആവശ്യപ്പെട്ടു.
ചില ഫോൺ കോളുകൾ കേന്ദ്രീകരിച്ച് നടത്തിയ അന്യേഷണത്തിൽ വലിയൊരു തട്ടിപ്പ് സംഘത്തെ അറസ്റ്റ് ചെയ്യാൻ പോലീസിന് സാധിച്ചിട്ടുണ്ട്, കൂടുതൽ പേർ തട്ടിപ്പിന്നിരയാകുന്നതിന് മുൻപ് തന്നെ സംഘത്തെ മുഴുവനായും കണ്ടെത്തി അറസ്റ്റ് ചെയ്യാൻ സാധിച്ചത് ഷാർജാ പോലീസിന്റെ വലിയ നേട്ടമായ് കരുതുന്നതായും വകുപ്പ് മേധാവി അറിയിച്ചു. ഫോണിലൂടെ ആവശ്യപ്പെടുമ്പോൾ എത്ര വേണ്ടപ്പെട്ടവർക്കായാലും ഒടിപി പിൻനമ്പരുകൾ കൈമാറരുതെന്നും പോലീസ് മുന്നറിയിപ്പ് നൽകുന്നു.
