ഒളിഞ്ഞിരിക്കുന്ന 1,700 ഓളം പുരാതന വൈറസുകളെ ഹിമാലയത്തിലെ ഹിമപാളികൾക്കുള്ളിൽ ഗവേഷകർ കണ്ടെത്തി. ഇതിൽ ഭൂരിഭാഗവും ശാസ്ത്രത്തിനു അജ്ഞാതമായിരുന്നുവെന്നാണ് നേച്ചർ ജിയോസയൻസ് ജേണലിൽ പ്രസിദ്ധീകരിച്ച പഠനത്തിൽ പറയുന്നത്. സമുദ്രനിരപ്പിൽനിന്നു ഏകദേശം നാല് മൈൽ ഉയരത്തിൽ സ്ഥിതി ചെയ്യുന്ന ടിബറ്റൻ പീഠഭൂമിയിലെ ഗുലിയ ഹിമാനിയിൽനിന്നു ശേഖരിച്ച ഹിമപാളികളിൽ വൈറസ് ഡിഎൻഎയുടെ തണുത്തുറഞ്ഞ അവശിഷ്ടങ്ങളാണ് ഗവേഷകർ കണ്ടെത്തിയത്.
കാലാവസ്ഥാ വ്യതിയാനങ്ങളുമായി ഈ വൈറസുകൾ എങ്ങനെ പൊരുത്തപ്പെടുന്നുവെന്നും, വരും വർഷങ്ങളിൽ ഇപ്പോഴുള്ള വൈറസുകൾ എങ്ങനെ മാറുമെന്നും ഗവേഷകർക്കു മനസിലാക്കാൻ കഴിയുമെന്നാണു പ്രതീക്ഷിക്കുന്നത്. 41,000 വർഷത്തിനിടയിൽ നിരവധി കാലാവസ്ഥാവ്യതിയാനങ്ങളിലൂടെ ഇവ വൈറസ് കടന്നുപോയിട്ടുണ്ട്. ഹിമപാളികളിൽ കണ്ടെത്തിയ വൈറസ് സമൂഹങ്ങളിലൊന്നിന് ഏകദേശം 11,500 വർഷം പഴക്കമുണ്ട്. ഈ വൈറസുകളെ കണ്ടെത്തിയത് 2015 ലാണ്.
സൈബീരിയ ഉൾപ്പെടെ ലോകത്തിലെ പല സ്ഥലങ്ങളിലും പെർമാഫ്രോസ്റ്റിൽ മരവിച്ച പുരാതന വൈറസുകൾ കണ്ടെത്തിയിട്ടുണ്ട്. കാലാവസ്ഥാ വ്യതിയാനം മൂലം ലോകമെമ്പാടുമുള്ള ഹിമാനികൾ ഉരുകുകയും വൈറസുകൾ മനുഷ്യരെ ബാധിക്കുമെന്ന ഭയം ഉണ്ടാക്കുകയും ചെയ്തിരുന്നു. എന്നാൽ, ഈ പുരാതന വൈറസുകൾ മൃഗങ്ങളെയോ, മനുഷ്യരെയോ അപേക്ഷിച്ച് ബാക്ടീരിയയെ ബാധിക്കുമെന്നാണ് വിദഗ്ധർ പറയ്യുന്നത്.
