ഏഷ്യാ കപ്പ് ക്രിക്കറ്റിൽ ഇന്ന് നിർണായകമായ സൂപ്പർ ഫോർ പോരാട്ടത്തിൽ ഇന്ത്യ ശ്രീലങ്കയെ നേരിടും. ഇന്ത്യൻ സമയം രാത്രി 7.30 മുതൽ ദുബായിലാണ് മത്സരം. സൂപ്പർ ഫോറിൽ കഴിഞ്ഞ ദിവസം പാകിസ്ഥാനോട് അഞ്ച് വിക്കറ്റിന്റെ തോൽവി വഴങ്ങിയ ഇന്ത്യയ്ക്ക് ഫൈനൽ പ്രതീക്ഷകൾ നിലനിറുത്താൻ ഇന്ന് ശ്രീലങ്കയെ തോൽപ്പിച്ചേ തീരൂ.
മറുവശത്ത് അഫ്ഗാനെ സൂപ്പർ ഫോറിൽ വീഴ്ത്തിയതിന്റെ ആത്മ വിശ്വാസത്തിലാണ് ശ്രീലങ്ക ഇന്ത്യയെ നേരിടാനിറങ്ങുന്നത്. ഇന്നത്തെ മത്സരവും ജയിച്ച് ഫൈനൽ പ്രതീക്ഷകൾ സജീവമാക്കാനാണ് ലങ്കയുടെ ശ്രമം. ഇന്ത്യൻ ടീമിൽ അക്ഷർ പട്ടേലൊ, ദിനേഷ് കാർത്തിക്കൊ ഇടം നേടാൻ സാധ്യതയുണ്ട്. ആവേശ് ഖാനും തിരിച്ചെത്തിയേക്കാം.
പാകിസ്ഥാനെതിരെ ഗ്രൂപ്പ് ഘട്ടത്തിൽ പുറത്തെടുത്ത പ്രകടനം ഞായറാഴ്ച സൂപ്പർ ഫോറിൽ ഇന്ത്യയ്ക്ക് പുറത്തെടുക്കാനായില്ല. ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ നിശ്ചിത 20 ഓവറിൽ ഏഴുവിക്കറ്റ് നഷ്ടത്തിൽ 181 റൺസടിച്ചു. മറുപടിക്കിറങ്ങിയ പാകിസ്ഥാൻ രണ്ട് പന്ത് ബാക്കി നിൽക്കെ അഞ്ച് വിക്കറ്റ് നഷ്ടപ്പെടുത്തി വിജയലക്ഷ്യത്തിലെത്തി (182/5).
