പാരിസ് ഒളിംപിക്സിൽ ഹോക്കിയിൽ ഫൈനൽ സീറ്റുറപ്പിക്കാൻ പി ആർ ശ്രീജേഷും സംഘവും ഇന്നിറങ്ങും. ജാവലിൻ ത്രോയിൽ നീരജ് ചോപ്രയും ഗുസ്തിയിൽ വിനേഷ് ഫോഗട്ടും ഇന്നിറങ്ങും. ക്വാർട്ടറിൽ ബ്രിട്ടനെ ഷൂട്ടൗട്ടിൽ വീഴ്ത്തിയാണ് ഇന്ത്യൻ ഹോക്കി ടീം സെമിയിൽ എത്തിയത്. ഗോൾകീപ്പറും മലയാളിയായുമായ പി ആർ ശ്രീജേഷിന്റെ മികവാണ് ക്വാർട്ടറിൽ ഇന്ത്യയ്ക്ക് തുണയായത്. ഒപ്പം ക്യാപ്റ്റൻ ഹർമ്മൻപ്രീത് സിങ്ങിന്റെ മിന്നും പ്രകടനവും ഇന്ത്യയ്ക്ക് ആത്മവിശ്വാസം നൽകുന്നു. സെമിയിൽ ജർമ്മനിയെ മറികടന്നാൽ ഇന്ത്യയ്ക്ക് വെള്ളിമെഡൽ ഉറപ്പിക്കാം. ഇന്ത്യൻ സമയം രാത്രി 10.30നാണ് മത്സരം.
ജാവലിൻ ത്രോ യോഗ്യത റൗണ്ടിന് ഇന്ന് തുടക്കമാവുകയാണ്. പുരുഷവിഭാഗം ജാവലിൻ ത്രോയിൽ ചാമ്പ്യൻ പട്ടം നിലനിർത്താൻ നീരജ് ചോപ്ര ഇന്നിറങ്ങുമെന്നതാണ് ഇന്ത്യയുടെ പ്രതീക്ഷകൂട്ടുന്നത്. നീരജിന് പുറമെ ഇന്ത്യൻ താരം കിഷോർ ജെനയും മത്സരിക്കുന്നുണ്ട്. യോഗ്യത റൗണ്ടിൽ ഗ്രൂപ്പ് എയിലാണ് ജെന. നീരജ് ഗ്രൂപ്പ് ബിയിലും. ഉച്ചയ്ക്ക് 1.50നാണ് യോഗ്യതാ റൗണ്ടിന് തുടക്കമാവുക. നീരജിന്റെ മത്സരം ഉച്ച തിരിഞ്ഞ് 3.30നാണ്.
ഗുസ്തിയിൽ ഇന്ത്യയുടെ മെഡൽ പ്രതീക്ഷയായ വിനേഷ് ഫോഗട്ട് ഇന്നിറങ്ങും. വനിതകളുടെ 50 കിലോഗ്രാം ഫ്രീസ്‌റ്റൈലിലാണ് പോരാട്ടം. പകൽ മൂന്നിനാണ് മത്സരം. വിനേഷ് ഫോഗട്ടിന് മുന്നോട്ടുപോവാൻ കഴിഞ്ഞാൽ ക്വാർട്ടർ ഫൈനൽ പോരാട്ടം ഇന്ന് വൈകിട്ട് 4.20നും സെമി ഫൈനൽ രാത്രി 10.25നും നടക്കും. അതേസമയം ടേബിൾ ടെന്നിസിൽ ഹർമീത് ദേശായി, ശരത് കമാൽ, മാനവ് താക്കർ എന്നിവർ പ്രീക്വാർട്ടറിൽ ചൈനയെ നേരിടും. ഉച്ചയ്ക്ക് 1.30നാണ് മത്സരം.
