ജനന മരണ സർട്ടിഫിക്കറ്റുകളും ഇനി ഓൺലൈനിൽ ; പുത്തൻ സംവിധാനം ഒരുക്കി സൗദി അറേബ്യ

സൗദിയിൽ ജനന മരണ സർട്ടിഫിക്കറ്റുകൾ കൂടി ഡിജിറ്റൽവൽക്കരിച്ചു. വ്യക്തിഗത പോർട്ടലായ അബ്ഷിറിലാണ് പുതിയ സേവനം ഉൾപ്പെടുത്തിയത്. ആഭ്യന്തര മന്ത്രാലത്തിന് കീഴിൽ നടന്നു വരുന്ന ഡിജിറ്റലൈസേഷൻ പദ്ധതിയുടെ ഭാഗമാണ് പുതിയ സേവനങ്ങൾ.ആഭ്യന്തരമന്ത്രാലയമാണ് സേവനങ്ങളുടെ പ്രഖ്യാപനം നടത്തിയത്. ജനന മരണ സർട്ടിഫിക്കറ്റുകൾ അനുവദിക്കുന്നതിനും രജിസ്ട്രേഷൻ ചെയ്യുന്നതിനും പുതിയ സംവിധാനം പ്രയോജനപ്പെടുത്താം. സ്വദേശികൾക്കും വിദേശികൾക്കും സേവനം പ്രയോജനപ്പെടുത്താൻ സാധിക്കും.

സർട്ടിഫിക്കറ്റുകളുടെ ആധികാരികത ഉറപ്പ് വരുത്തുന്നതിനും ഉപയോക്താക്കളുടെ സമയവും പ്രയത്നവും ലാഭിക്കുന്നതിനും പുതിയ സംവിധാനം സഹായിക്കുമെന്ന് മന്ത്രാലയ വൃത്തങ്ങൾ വ്യക്തമാക്കി. രാജ്യത്ത് നടപ്പിലാക്കി വരുന്ന ദേശീയ പരിവർത്തന പദ്ധതിയുടെ ഭാഗമായി നടപ്പിലാക്കുന്ന ഡിജിറ്റൽവൽക്കരണത്തിൽ ഉൾപ്പെടുത്തിയാണ് പുതിയ സേവനങ്ങൾ.