പുതുവർഷ സമ്മാനം ; ഖത്തറിൽ മെട്രോയുടെ പ്രവർത്തനം സമയം നീട്ടി

ഖത്തറിലെ സ്വദേശികൾക്കും താമസക്കാർക്കും പുതുവർഷ സമ്മാനമായി ദോഹ മെട്രോയുടെ പ്രവർത്തന സമയം ദീർഘിപ്പിച്ച് ഖത്തർ റെയിൽ.ജനുവരി ഒന്ന് മുതൽ പുലർച്ചെ അഞ്ച് മുതൽ ദോഹ മെട്രോ സർവീസ് ആരംഭിക്കും. സർവീസ് അവസാനിപ്പിക്കുന്ന സമയം അർധരാ​ത്രി ഒരു മണിവരെയായും നിശ്ചയിച്ചു. നേരത്തെ 11.59 വരെയായിരുന്നു ​മെട്രോ ഓടിയത്. ശനിയാഴ്ച മുതൽ വ്യാഴാഴ്ച വരെയാണ് ഈ സമയം. വെള്ളിയാഴ്ചകളിൽ രാവിലെ ഒമ്പത് മണി മുതൽ സർവീസ് ആരംഭിക്കും. നിലവിൽ ഉച്ചക്ക് രണ്ട് മണി മുതലാണ് സർവീസ് നടത്തുന്നത്. വെള്ളിയാഴ്ചകളിലും അർധരാ​ത്രി ഒരു മണിവരെ സർവീസ് നടത്തും.

ലുസൈൽ ട്രാമും പുതുവർഷത്തിൽ പുതിയ ഷെഡ്യൂളിലേക്ക് മാറും. ശനിയാഴ്ച മുതൽ വ്യാഴാഴ്ച വരെ രാവിലെ അഞ്ച് മുതൽ 1.30 വരെയും സർവിസ് നടത്തും. വെള്ളിയാഴ്ച രണ്ട് മുതൽ 1.30 വരെയാണ് സർവീസ്.