അർജന്റീന ടീം ദോഹയിൽ എത്തുന്നത് പ്രത്യേകം അലങ്കരിച്ച വിമാനത്തിലെന്ന് റിപോർട്ടുകൾ

ദോഹ: ഖത്തർ ലോകകപ്പിനോടനുബന്ധിച്ച് അർജന്റീന ടീം ദോഹയിൽ എത്തുന്നത് പ്രത്യേകം അലങ്കരിച്ച വിമാനത്തിലെന്ന് റിപോർട്ടുകൾ. ലോകകപ്പ് നവംബർ 20 മുതൽ ഡിസംബർ 18 വരെയാണ് നടക്കാനിരിക്കുന്നത്. അർജൻറീന ദേശീയ പതാകയും സൂപ്പർ താരങ്ങളായ ലയണൽ മെസ്സി, എയ്​ഞ്ചൽ ഡി മരിയ, ​റോഡ്രിഗോ ഡി പോൾ എന്നിവരുടെ ചിത്രങ്ങളും കൊണ്ട് അലങ്കരിച്ച വിമാനത്തിലാകും ടീം എത്തുന്നത്. ഇത് കൂടാതെ വാചകങ്ങളും വിമാനത്തിൽ പതിപ്പിച്ചിട്ടുണ്ട്. 'ഒരു ടീം, ഒരു രാജ്യം, ഒരു സ്വപ്​നം' എന്ന വാചകങ്ങൾ പതിപ്പിച്ച എയിറോലിനാസ് അർജൻറീനയുടെ എയർബസ്​ എ 330 കൂറ്റൻ വിമാനത്തിലാവും ഇവരെത്തുക. കളിക്കാരും പരിശീലക സംഘവും ടീം സ്​റ്റാഫുമെല്ലാം ദോഹയിലേക്ക്​ പറക്കാനൊരുങ്ങി കഴിഞ്ഞു​. ഖത്തർ സർവകലാശാല ക്യാമ്പസിലാണ്​ ടീമിനുള്ള താമസവും പരിശിലനവുമെല്ലാം ഒരുക്കിയിരിക്കുന്നത്.