വീട്ടുജോലിക്കാരിയുടെ സ്വർണമാല മോഷ്ടിച്ചെടുത്ത ദമ്പതിമാരടക്കം മൂന്നുപേർ അറസ്റ്റിൽ

കോട്ടയം വീട്ടുജോലിക്കാരിക്ക് കൂലിക്കുപകരം ടിവി നൽകിയശേഷം ഇവരുടെ സ്വർണമാല മോഷ്ടിച്ചെടുത്ത ദമ്പതിമാരടക്കം മൂന്നുപേർ അറസ്റ്റിൽ. എറണാകുളം മരട് ആനക്കാട്ടിൽ വീട്ടിൽ ആഷിക് ആന്റണി (31), ഭാര്യ നേഹാരവി (35), എറണാകുളം പെരുമ്പടപ്പിൽ വാടകയ്ക്ക് താമസിക്കുന്ന ആലപ്പുഴ അരൂർ ഉള്ളാറക്കളം വീട്ടിൽ അർജുൻ (22) എന്നിവരാണ് അറസ്റ്റിലായത്.

കോട്ടയം അയ്മനം സ്വദേശിനിയായ വീട്ടമ്മയുടെ രണ്ടുപവന്റെ മാലയാണ് ഇവർ മോഷ്ടിച്ചത്. ഒക്ടോബർ 16-നായിരുന്നു കേസിനാസ്പദമായ സംഭവം നടന്നത്. വീട്ടമ്മ ആഷിക് ആന്റണിയുടെ വീട്ടിൽ വീട്ടുജോലി ചെയ്തുവരികയായിരുന്നു. ഈ വകയിൽ കൂലി കുടിശ്ശികയുമുണ്ടായി. എന്നാൽ കൈയിൽ പണമില്ലാത്തതിനാൽ പ്രതിയുടെ വീട്ടിലിരിക്കുന്ന ടി വി നൽകാമെന്നും, കുടിശ്ശികയായ കൂലി കുറച്ചശേഷം ടി വിയുടെ വിലയായി 8,000 രൂപ ആഷിക് ആന്റണിക്ക് തിരികെ കൊടുത്താൽ മതിയെന്നും ഇരുവരും ധാരണയിൽ എത്തുകയും ചെയ്തു.

അടുത്തദിവസം ടി വി ഫിറ്റ്ചെയ്യുന്നതിനായി ആഷിക്കും ഭാര്യയും സുഹൃത്തായ അർജുനും വീട്ടമ്മയുടെ കോട്ടയത്തെ വീട്ടിലെത്തുകയും ടി വി ഫിറ്റ് ചെയ്യുന്നതിനിടെ വീട്ടമ്മയുടെ മുറിയിൽ സൂക്ഷിച്ചിരുന്ന മാല മോഷ്ടിച്ചെന്നുമാണ് ആരോപണം. തുടർന്ന് വീട്ടമ്മയുടെ പരാതിയിൽ കോട്ടയം വെസ്റ്റ് പോലീസ് കേസെടുത്തു. ഒളിവിൽ കഴിഞ്ഞുവന്ന ആഷിക് ആന്റണിയെയും ഭാര്യയെയും പഴനിയിൽ നിന്നും അർജുനെ എറണാകുളത്തുനിന്നുമാണ് പിടികൂടിയത്.