തുമ്പയിൽ വള്ളം മറിഞ്ഞ് കാണാതായ മത്സ്യതൊഴിലാളിയുടെ മൃതദേഹം കണ്ടെത്തി

തിരുവനന്തപുരം തുമ്പയിൽ വള്ളം മറിഞ്ഞ് കാണാതായ മത്സ്യതൊഴിലാളിയുടെ മൃതദേഹം കണ്ടെത്തി. തുമ്പ സ്വദേശി 65 വയസുള്ള ഫ്രാൻസിസ് അൽഫോൺസിന്റെ മൃതദേഹമാണ് സൗത്ത് തുമ്പ ഭാഗത്ത് നിന്നും കണ്ടെത്തിയത്. കഴിഞ്ഞ ചൊവ്വാഴ്ച രാവിലെയാണ് അഞ്ചംഗ സംഘം മത്സ്യബന്ധനത്തിനായി പുറപ്പെട്ടത്. കരയിൽ നിന്നും വളരെ അകലെയല്ലാതെ ശക്തമായ തിരയടിയിൽ വള്ളം മറിയുകയായിരുന്നു.

വള്ളത്തിൽ ഉണ്ടായിരുന്ന മറ്റുനാലു പേർ നീന്തി രക്ഷപ്പെട്ടു. എന്നാൽ ഫ്രാൻസിസിനെ ശക്തമായ ഒഴുക്കിൽപ്പെട്ട് കാണാതായിരുന്നു. മത്സ്യ തൊഴിലാളികളും തീരദേശ പോലീസും കോസ്റ്റു ഗാർഡും സംയുക്തമായി തെരച്ചിൽ നടത്തിയെങ്കിലും ഫ്രാൻസിസിനെ കണ്ടെത്താനായിരുന്നില്ല. ഇന്ന് വെളുപ്പിനാണ് സൗത്ത് തുമ്പ ഭാഗത്ത് കടലിൽ മൃതദേഹം കണ്ടെത്തിയത്. കരയിലെത്തിച്ച മൃതദേഹം മെഡി. കോളേജ് മോർച്ചറിയിലേക്ക് മാറ്റി.