വാൽപാറയിൽ കരടിയുടെ ആക്രമണം; യുവതിക്ക് ഗുരുതര പരുക്ക്

വാൽപാറയിൽ കരടിയുടെ ആക്രമണത്തിൽ തോട്ടം തൊഴിലാളിയായ യുവതിക്ക് ഗുരുതരമായി പരുക്കേറ്റു. ഇഞ്ചിപ്പാറ എസ്റ്റേറ്റിലെ തൊഴിലാളിയും ജാർഖണ്ഡ് സ്വദേശിനിയുമായ സബിതയ്ക്കാണ് പരുക്കേറ്റത്. ഇന്ന് രാവിലെ 5.30ന് വീടിന് പുറത്തേക്ക് ഇറങ്ങിയ സബിതയുടെ മേൽ കരടി ചാടി വീഴുകയായിരുന്നു.

കയ്യിലും കാലിലും ഗുരുതരമായി പരുക്കേറ്റ സബിതയെ വാൽപാറയിലെ സർക്കാർ ആശുപത്രിയിലും തുടർന്ന് പൊള്ളാച്ചിയിലെ ആശുപത്രിയിലേക്കും മാറ്റി. കരടിയുടെ സിസിടിവി ദൃശ്യങ്ങൾ പുറത്തുവന്നു. മേഖലയിൽ ഒരു മാസത്തിനിടെ ഉണ്ടാകുന്ന നാലാമത്തെ കരടി ആക്രമണമാണിത്.