കള്ളക്കേസിൽ കുടുക്കാനുള്ള തോമസ് കെ തോമസ് എം എൽ എയുടെ നീക്കം നിയമപരമായി നേരിടുമെന്ന് എൻ സി പി നേതാവ് റെജി ചെറിയാൻ. തോമസ് കെ തോമസിന്റെ പരാതിയിൽ യാതൊരു സത്യവുമില്ല.ആലപ്പുഴ ജില്ലയിലെ എൻ സി പി പ്രവർത്തകർ ഒന്നടങ്കം സംസ്ഥാന കമ്മിറ്റിയുടെ കൂടെയാണ് നിൽക്കുന്നത്. ഒറ്റ തിരിഞ്ഞ് വിഭാഗീയ പ്രവർത്തനം നടത്തുന്ന തോമസ് കെ തോമസിന് വരും കാലത്ത് മന്ത്രിയാകാനുള്ള പരിശ്രമങ്ങളുടെ ഭാഗമായിട്ടാണ് ഈ പരാതിയെന്നും റെജി ചെറിയാൻ പറഞ്ഞു .ആരോപണങ്ങൾക്ക് അദ്ദേഹത്തിന്‍റെ കൈയിൽ തെളിവില്ല. പോലീസ് അന്വേഷിച്ച് ഇതിന് തെളിവുണ്ടോയെന്ന് കണ്ടുപിടിക്കണം. അത് എന്‍റെയും കൂടെ ആവശ്യമാണെന്നും റെജി ചെറിയാൻ വ്യക്തമാക്കി.
അതേസമയം കൊല്ലാൻ ശ്രമിച്ചുവെന്ന തോമസ് കെ തോമസ് എം എൽ എയുടെ ആരോപണം സത്യവിരുദ്ധമാണെന്ന് മുൻ ഡ്രൈവർ ബാബുക്കുട്ടനും വ്യക്തമാക്കി. അങ്ങനെ ഒരുനീക്കവും നടന്നിട്ടില്ല. 2002ൽ തോമസ് ചാണ്ടിയുടെ കാലത്താണ് ഡ്രൈവർ ജോലിക്ക് കയറിയത്. വണ്ടിയോടിക്കുമ്പോൾ സ്ഥിരമായി കുറ്റം പറയുന്നതിനാലാണ് ജോലി ഉപേക്ഷിച്ചതെന്നും ബാബുക്കുട്ടൻ പറഞ്ഞു.
