ബിജെപിയുമായി ഇടഞ്ഞ സന്ദീപ് വാര്യർ കോൺഗ്രസിൽ ചേർന്നു.പാലക്കാട്ടെ കോൺഗ്രസ് ഓഫീസിൽ എത്തിയ സന്ദീപ് വാര്യരെ കെ.പി.സി.സി പ്രസിഡൻ്റ് കെ.സുധാകരൻ എം.പി, പ്രതിപക്ഷ നേതാവ് വി.ഡി സതീശൻ , എം.പിമാരായ വി.കെ ശ്രീകണ്ഠൻ , ഷാഫി പറമ്പിൽ , ബെന്നി ബഹനാൻ തുടങ്ങിയവർ ചേർന്ന് സ്വീകരിച്ചു. ബിജെപി നേതൃത്വവുമായുള്ള അഭിപ്രായ ഭിന്നത പരസ്യമാക്കിയ സന്ദീപ് ഉപതെരഞ്ഞെടുപ്പ് പ്രചാരണത്തിൽ സജീവമായിരുന്നില്ല. സിപിഐഎം നേതൃത്വവുമായി സന്ദീപ് വാര്യർ ചർച്ച നടത്തിയതായി റിപ്പോർട്ടുണ്ടായിരുന്നു.സന്ദീപ് നല്ല നേതാവാണെന്നും വന്നാൽ സ്വീകരിക്കുമെന്നും സിപിഐഎം നേതാവ് എ.കെ ബാലൻ പറയുകയും ചെയ്തിരുന്നു. ഇതിനിടെയാണ് അപ്രതീക്ഷിതമായി സന്ദീപ് കോൺഗ്രസിലേക്ക് എത്തുന്നത്. കോൺഗ്രസിൻ്റെ മിന്നൽ നീക്കമാണ് പാലക്കാട് നടന്നത്. അതേസമയം അപ്രസക്തമായ വ്യക്തി അപ്രസക്തമായ പാർട്ടിയിലേക്ക് പോകുന്നു എന്നായിരുന്നു ബിജെപി നേതാവ് പ്രകാശ് ജാവ്ദേക്കറുടെ പ്രതികരണം.
