പാലക്കാട് പാർട്ടി ആരെ മത്സരിപ്പിച്ചാലും പിന്തുണച്ച് പ്രവ‍ർത്തിക്കും; ശോഭ സുരേന്ദ്രനും താനും ഒരേ മനസോടെ പ്രവർത്തിക്കുന്നവരെന്ന് സി കൃഷ്ണകുമാർ

ശോഭ സുരേന്ദ്രനോട്‌ പിണക്കമേയില്ലെന്ന് ബിജെപി നേതാവ് സി.കൃഷ്ണകുമാർ. പ്രചരിക്കുന്നതെല്ലാം കെട്ടുകഥകൾ മാത്രമാണെന്നും രണ്ടുപേരും ഒരേ മനസോടെ പ്രവർത്തിക്കുന്ന ഭാരവാഹികളാണെന്നും അദ്ദേഹം പാലക്കാട് പറഞ്ഞു. യുവമോർച്ച കാലം തൊട്ട് ഒരുമിച്ച് പ്രവർത്തിക്കുന്നവരാണ് ‌ഞങ്ങൾ.

താൻ ക്ഷണിച്ചിട്ടാണ് ശോഭ ആദ്യമായി പാലക്കാട്‌ മത്സരിച്ചത്. അന്ന് താൻ യുവമോർച്ച ജില്ലാ അധ്യക്ഷനായിരുന്നു. ബിജെപിയുട വനിതാ മുഖമാണ് ശോഭ സുരേന്ദ്രൻ.

പ്രമുഖ നേതാക്കളിൽ ഒരാളാണ് ശോഭ. എവിടെ മത്സരിച്ചാലും വോട്ട് കൂടിയിട്ടുണ്ട്. ബിജെപിയുടെ ഏത് പ്രവർത്തകരോട് ചോദിച്ചാലും ശോഭയുടെ പേര് പറയും. അതിൽ എന്താണ് തെറ്റ്? പാർട്ടി ആരെ നിർത്തിയാലും പിന്തുണക്കും.

പാർട്ടി എന്താവശ്യപെട്ടാലും അത് ചെയ്യാൻ തയ്യാറാണെന്ന് മത്സരിക്കുമോയെന്ന ചോദ്യത്തോടും അദ്ദേഹം പ്രതികരിച്ചു. എതിർ ഭാഗത്ത്‌ രാഹുൽ ഗാന്ധി വന്ന് മത്സരിച്ചാലും വിഷയമല്ല, അത്രക്ക് ശക്തമാണ്‌ പാലക്കാട്‌ ബിജെപിയെന്നും കൃഷ്ണ കുമാർ പറഞ്ഞു.