റഷ്യന്‍ പ്രദേശങ്ങളിലേക്ക് യുക്രൈന്‍ ഡ്രോണാക്രമണം നടത്തിയെന്നും ഒരു എണ്ണ ശുദ്ധീകരണശാലയുടെ പ്രവര്‍ത്തനം നിര്‍ത്തിവയ്ക്കേണ്ടി വന്നതായും റഷ്യ. കുറഞ്ഞത് 103ലധികം ഡ്രോണുകള്‍ വെടിവച്ചിട്ടതായി മോസ്കോ അറിയിച്ചു.
റഷ്യയിലെ തെക്കൻ ക്രാസ്നോദർ മേഖലയിലെ സ്ലാവ്യൻസ്‌കിലെ എണ്ണ ശുദ്ധീകരണശാലയുടെ പ്രദേശത്ത് ആറ് ഡ്രോണുകൾ തകർന്നതായി പ്രാദേശിക ഉദ്യോഗസ്ഥർ പറഞ്ഞു.ആക്രമണത്തെ തുടർന്ന് റിഫൈനറിയുടെ പ്രവർത്തനം നിർത്തിവെച്ചതായി ഇന്റർഫാക്‌സ് വാർത്താ ഏജൻസി അറിയിച്ചു. മുന്‍പ് യുക്രൈന്‍ നടത്തിയ ഡ്രോണ്‍ ആക്രമണത്തെക്കാള്‍ വലുതാണെന്നും അവയിൽ സ്റ്റീൽ ബോളുകൾ ഉൾപ്പെടുന്നുവെന്നും റിഫൈനറിയിലെ ഒരു ഉദ്യോഗസ്ഥനെ ഉദ്ധരിച്ച് റഷ്യന്‍ ന്യൂസ് ഏജന്‍സിയായ ടാസ് റിപ്പോര്‍ട്ട് ചെയ്യുന്നു. പ്രതിവർഷം 4 ദശലക്ഷം മെട്രിക് ടൺ ശുദ്ധീകരണ ശേഷിയുള്ള, ഏകദേശം 1 ദശലക്ഷം ബിപിഡി ശേഷിയുള്ള ഒരു സ്വകാര്യ പ്ലാന്റാണ് സ്ലാവ്യൻസ്ക് റിഫൈനറി.
റഷ്യയുടെ തെക്കൻ ക്രാസ്നോദർ മേഖലയിലെ സ്ലാവ്യൻസ്ക് റിഫൈനറിയിലും സൈനിക താവളത്തിലും ഉക്രെയ്നിന്റെ സുരക്ഷാ സേവനമായ എസ്ബിയുവും സൈനിക ഡ്രോണുകളും ഒറ്റരാത്രികൊണ്ട് ആക്രമണം നടത്തിയതായി ഒരു യുക്രേനിയൻ രഹസ്യാന്വേഷണ വിഭാഗം റോയിട്ടേഴ്‌സിനോട് പറഞ്ഞു.റഷ്യൻ കരിങ്കടൽ കപ്പലിന്റെ പ്രൊജക്റ്റ് 266-എം കോവ്‌റോവെറ്റ്‌സ് മൈൻസ്വീപ്പർ നശിപ്പിച്ചതായും യുക്രേനിയൻ നാവികസേന അറിയിച്ചു. യുക്രൈന്‍റെ 24, 42 യന്ത്രവൽകൃത ബ്രിഗേഡുകളെയും ഖാർകിവ് മേഖലയിലെ ലുക്കിയാൻസി, വെസെലെ, റദോസ്‌പ്‌നെ എന്നിവിടങ്ങളിലെ 125-ാമത് എയർ ഡിഫൻസ് ബ്രിഗേഡിനെയും തങ്ങളുടെ സൈന്യം പരാജയപ്പെടുത്തിയതായും മേഖലയിലെ മറ്റ് സ്ഥലങ്ങളിൽ കിയവ് സേനയുടെ ആക്രമണത്തെ ചെറുത്തുവെന്നും റഷ്യ വ്യക്തമാക്കി.
